[walaa farouk]

عارف لما تبقى عارف الحق بس مش قادر تعيشه🤦🏻
عارف لما تبقى عندك معلومة أن ربنا قادر بس أنت قلقان جداً
سمعت كتير عن حبه وتأثرت بده كمان بس مش قادر تسامح نفسك😕
ومش قادر تعيش الحب ده!
عارف لما تبقى عارف أنك في حرب روحية على ذهنك.. بس مش قادر تتحرر منها😩

عارف؟!!
أنا مش عارف أشرحلك قد أيه الشعور ده مؤلم ومحبط ويوجع 🥺

إمبارح كنت قاعد عمال أصارع في الفكرة دي فجالي تليفون غريب من صاحب إتصل مخصوص عشان يقولي حاجة جميلة قوي!
قالي أنت مش محتاج وعظ ولا حد يقولك حاجة ولا حد يشجعك. ولا معلومات ولا ولا ولا..
أنت محتاج الركب المنحنية🧎🏻‍♂️
زي ما صلى بولس لأهل أفسس وقال
"بسَبَبِ هذا أحني رُكبَتَيَّ لَدَى أبي رَبِّنا يَسوعَ المَسيحِ،"
يعني بولس بيحني ركبته عشانهم طول الوقت، عشان شوية حاجات كدة رغم أنهم ممكن يكونوا عارفينها. ممكن كمان يكون وعظهم عنها لكنهم لسة مدخلتش حيز التنفيذ عندهم!
شوية أفعال بعدها قالها الرسول ليهم يُعطيَكُمْ..... تتأيَّدوا..... ليَحِلَّ.... تستَطيعوا.... تُدرِكوا ....تَعرِفوا …. تمتَلِئوا....
كل ده بعد "أحني رُكبَتَيَّ"

في وقت صعب مش بيعدي غير بالركب المنحنية، غير أنك تحني ركبتك!
وأنك تطلب من أخوات ليك أنهم يشاركوك ويحنوا ركبهم عشانك حتى لو ميعرفوش التفاصيل لكن بس تطلب منهم ركبهم تنحني عشانك!

صديقي لو مش قادر تخطي لسبب أو لآخر نشجعك في أول يوم في السنة تحني ركبتيك وتطلب مساعدة ناس تاني تعمل كدة معاك