[walaa farouk]

ساعات كتير كدة تدور على تليفونك
وتقعد تفكر تكلم مين متلاقيش حد..
مش بقول تتقابل مع حد لأ.. تكلم بس حد!
وحدة شديدة وغربة شديدة حاسس بيها
لدرجة أنك مش لاقي حتى حد تكلمه
"وحدة" مُرعبة ومؤلمة وخصوصا وسط عصر مليان
زحمة السوشيال ميديا المزيفة
لكن عند الجد النتيجة غُربة ووحدة رهيبة ووجع وسط الزحام..
اسع كلمات الرب يسوع دي في يوحنا 16 لتلاميذه: "
هوذا تأتي ساعَةٌ، وقَدْ أتَتِ الآنَ، تتَفَرَّقونَ فيها كُلُّ واحِدٍ إلَى خاصَّتِهِ، وتَترُكونَني وحدي."
يعني كل واحد هيروح للي وراه واللي يهمه وعند الجد مش هلاقي حد منكم معايا.. وهتسبوني وحدي
متخيل الوجع اللي في الكلام ده وأد إيه مشاعر الرب يسوع في الوقت ده..
ممكن تكون زي الرب يسوع في المشهد ده الكل سابك وملخوم عنك ومش بس كده لكن حتى أقرب الناس ليك اللي كنت متخيلهم جانبك مش متاحين أو يمكن متاحين بس أنت مش قادر حتى تتواصل معاهم.
ومش قادر حتى تعبر..
يعني ببساطة كدة حاسس بوحدة شديدة وغربة مؤلمة
لكن اسمع كلمات الرب يسوع بعدها بيقولهم إيه:
"وأنا لَستُ وحدي لأنَّ الآبَ مَعي."
الله الله الله على الكلمات
مقلش الله معي. مقلش الخالق معي . مقلش الرب معي .
مقلش يهوه معي ...... إلخ
قال الآب ... قال بابا ... بابا معي
لو الكل سايبك بابا معاك
لو الكل مش متاح بابا دايماً متاح
لو حاسس بغربة ومفيش حد قريب منك، بابا مفيش أقرب منه
لو الكل سابك وأتلخم باللي واره ولا يهمك يا عم ده بابا بنفسه معاااااك