[walaa farouk]

الكدب له شروط علشان ينجح ..

اهمها انك تكدب علي نفسك و تخدعها لدرجة انك تصدقها و تؤمن بالكدبة علشان تقدر تقنعك انت ، فتقنع الناس ..

من ضمن "مشروع الكدبة" ، هو الإنكار denial، يعني تخبي علي عقلك الحقيقة اللي ممكن توعيه ..
يعني تبقي شايف مثلا عيوب شخص في الارتباط، "فتخبيها" علي عقلك و ما توريهالوش، فيصاب بالعمي ، فيقتنع بيها و يدافع عن القرار بكل قوة و بشراسة..

نقطة كمان اسمها "المعلومة الانتقائية" او selective information، يعني تنقل لنعقلك و للناس اللي يحبوا يسمعوه من غير ما تقول الحقيقة كاملة .. زي البياع اللي يوري كل مزايا البضاعة ، و ما يقولش مشاكلها و عيوبها و يسيبك تكتشفها بعد البيعة ما تخلص !!

كده برضه العقل بيخبي المعلومة الصح "عن نفسه" ، فيريح باله انه "صح" و يكمل مشوار الكدب ..

الكذب عملية معقدة جدا ، تخدع الإنسان نفسه قبل ما يخدع هو الناس ..

الحل انك "تفضح نفسك قدام نفسك" ، و تظبط كدبها ، و تنور عقلك بالحق و الاستنارة ، و تطلب المشورة بصدق من الله و من الناس ..