[walaa farouk]

بنسمع ناس كتير حوالينا بتقول..
إن الموت هو الحقيقة الوحيدة في حياتنا،
والموت حقيقة فعلاً..
بنقابله كل يوم بأشكال وصور كتيرة،
وكلنا بنخاف منه،
ومحدش في البشر قدر إنه يوقفه..
وده اللي أكده لينا سفر المزامير
"أَيُّ إِنْسَانٍ يَحْيَا وَلاَ يَرَى الْمَوْتَ؟" (مز89: 48)،
لكن الموت مش هو الحقيقة الوحيدة!
لما بنرجع للكتاب المقدس
بنعرف إن الله لما خلق الإنسان..
مكنش غرضه إن الإنسان
يعيش فترة من الزمن ويموت..
لكنه خلق الإنسان علشان يعيش معاه
في علاقة حية وأبدية.
لكن للأسف الإنسان اختار إنه يعيش
في الخطية بعيد عن الله..
وباختيار الإنسان للخطية دخل الموت لكل العالم،
لكن القصة منتهتش على كده..
الله الصالح والمُحب قرر إنه ينقذ البشر من الموت،
قرر إنه يصلح غلطة الإنسان بنفسه..
وده من خلال مجيئه للعالم وتجسده في صورة المسيح،
وكان أهم هدف لمجيء المسيح للعالم
إنه يوهب الحياة لكل ميت..
وده أعلنه لينا لما قال:
"وَأَمَّا أَنَا فَقَدْ أَتَيْتُ لِتَكُونَ لَهُمْ حَيَاةٌ
وَلِيَكُونَ لَهُمْ أَفْضَلُ." (يو10: 10)..
وبموت المسيح على الصليب رفع عنا حُكم الموت،
وأعطى حياة أبدية لكل شخص آمن بيه..
المسيح بيدي رجاء لكل شخص..
خايف من الموت ومش عارف يعمل أيه..
يا بختك لو أخدت قرار إنك تحط ثقتك
ويقينك في المسيح الحي اللي بيدي حياة لكل البشر،
"لأَنَّ أُجْرَةَ الْخَطِيَّةِ هِيَ مَوْتٌ،
وَأَمَّا هِبَةُ اللهِ فَهِيَ حَيَاةٌ أَبَدِيَّةٌ
بِالْمَسِيحِ يَسُوعَ رَبِّنَا." (رو6: 23). 😇