جددي حياتك مع بنتك ب 8 خطوات
_فين أيام زمان أيام ما كانت الضحكه بتخرج من القلب
=اه يا بنتي الواحد من ساعه ما كبر وبقى الضغوط بتزيد عليه كل يوم اكثر من اللي قبله
=وبقيت عصبيه جدا مع بنتي غصب عني والبنت بقت مش بتبطل عياط وكئيبه جدا مش عارفه ليه
____________________
حوار خلاني أفكر في نفسي واللي حواليا كنا إيه زمان وبقينا إيه
بس اللي لاحظته وممكن تشوفوه انتوا كمان حواليكم بسهوله إن البنت اللي كانت فرفوشه وهي صغيره وعندها سلام نفسي أعلى من اللى حواليها ومعامله أسرتها معاها كانت لطيفه لما كبرت بقت تقدر تقاوم وتعدي ضغوط الحياه أسهل من عكسها من البنات اللي طفولتهم كانت كئيبة
����عشان كده هقولكم في المقال ده على 8 خطوات
إذا طبقتيها مع بنتك هتكون أكثر سلام نفسي وهتقدري تقوى مناعتها النفسيه
1_دربيها على الإمتنان
ممكن مثلا قبل ما تناموا أو أول ما تصحوا تكتبوا ايه أكتر 3 حاجات مثلا في اليوم او الاسبوع كنتوا ممتنين لها فى كراسه وتسموها كراسة السعاده مثلا
لأن الدراسات أثبتت أن الأشخاص الأكثر إمتنان حياتهم أفضل من غيرهم ومشاكلهم الصحيه أقل زي الصداع والأم المعده وإضطرابات النوم
2_بدلي الحلويات في أكلك بالفاكهه والخضار
عاداتنا الغذائيه السليمه أو الضاره مش بتاثر بس على صحتنا الجسديه ولكن بتاثر تأثير مباشر على صحتنا النفسيه كمان
ابدئي اعملي لبنتك بدائل من الفواكه والمكسرات بدل الشيكولاته وال candy
3_دربيها على مساعده وإسعاد الناس
ودي من اكثر الطرق اللي بتكسب بنتك الصلابه النفسيه والسلام النفسي
علماء نفس زي "ألفرد ادلر" و "فرويد" أثبتوا بالتجارب ودراسات الحالة أن الإنتظام على إسعاد شخص بالفعل كل يوم لمده 14 يوم او أكتر مهما كان الفعل بسيط بيزود معدلات السعاده وبيعالج الاكتئاب
4_أطبخي معها
مشاركتك لبنتك في المطبخ بيخلق لحظات سعاده وبيزود الإبداع والإستقلال ومهارات التفكير حتى لو حاجات بسيطه كل اسبوع زي فشار أو عصير أو فطار
5_قضى معها وقت طويل في الهواء والطبيعه
مقاطعه الشاشات وتبديلها بالطبيعه بيساعد على تجديد الروح و تقويه المناعه النفسيه والجسديه ومواقف وذكريات مع البنت ما تتنسيش
6_إقرائي معاها
ممكن تاخذي وقت شويه لغايه ما تخليها تسيب الشاشات وتقرأ معاكي بس مجرد ما هيحصل ده مش هتبقى عاوزه تتوقف
والموضوع ده هيخلق بينكم روابط إيجابيه هتدوم طول العمر و هتساعدك تعلميها القيم والاخلاق بطريقة لطيفة
7_ألعبي معاها كل يوم
حتي لو وقت قليل المهم الاستمراريه وإختيار الألعاب اللى بتحبها البنت
8_خليها تشاركك تفاصيل حياتك
زي انها تنقى معاكي لون لبس أو تاخدي رأيها فى قرار معين المهم بلاش تشاركك المشاكل زي أنك تشتكلها من باباها مثلا��