[walaa farouk]

لا اخفي عنك ان من وسط كل ايام الاسبوع الجمعة عند المسحيين حاجة تانية خااالص.
هو بالحقيقة يوم مميز بطريقة غريبة ... تبص تلاقي نفس الي بيحصل ،بيحصل كل جمعة عادي .. مفيش حاجة ملموسة تقدر تقولك انه يوم مميز ؛ بس هو "يوم الرب " عند اغلب شعب الكنيسة الأرثوذكسة ..❤
بيبدأ يومنا مع اول شعاع شمس بيطبطب علي الليل يدفيه ...تلاقي كل شاب و كل ولد صغير (أغلبهم) يقوم يجهز "تونيته" عشان يبدأ يتحرك علي القداس الي هو يوم الجمعة بيكون ليه طقوس عرفية مختلفة ... اغلب الكنايس تلاقيها عمله قداس للاطفال يوم الجمعة ؛ ولعل القداس هو اشارة البدأ ليوم حقيقي مختلف ..
تخش الكنيسة تلاقي طالب كان سهران طول الليل يذاكر بس بيقاوم النوم عشان يقف قدام ربنا ، تلاقي الخادم الي باصص لصورة المسيح و قلبه بيصرخ لأجل ولاده .. تلاقي الام الي جابت ولادها و كل طلبها انهم بس يكونوا ثمرة صالحه ... تلاقي ملايكه واقفه ؛ منظر يجبر قلبك -حتي لو في دوشة - انه يبقي فرحان فرحة من نوع غريب ... اسمها فرحة الجمعة في الكنيسة.❤
يخلص القداس و تبدأ الاطفال تتحرك ويا الخدام عشان الي يجيب اندومي و يقعد ياكل و الي يضربله طبق فول من علي عربية الفول الي جنب كل كنيسة عشان تتحول فقرة الفطار الي مفيش طفل بيحبها في بيته لفترة اغابي او فترة محبة كل واحد بينشأها بقلبه مع صاحبه او الخادم بتاعه..❤
و طول اليوم يا جدع ؛ تخش الكنيسه تتدوب وسط الزحمة ، يفرح قلبك منظر ولاد بيردده اية بكل قلبهم ... يخطف قلبك منظر خادم واقف يشرح و كاهن قاعد يسمع وسط الولاد في منظر يغير قلبك ... منظر مفيش كلام يشرحه بس القلب المسيحي بيرقص بيه ..❤
يشد عنيك منظر شاب عنيه دمعت و هو بيصلي ؛ منظر غريب بس قلبه بيصرخ صرخات لأجل امر خاص بينه و بين ابوه السماوي .❤
تقف في الحوش و تحاول تسمع كده بودنك ؛ تلاقي في نغمة غريبة .
.. هي خليط بين لحن بيحفظوا شمامسة بقلبهم و ايه بيرددها الأطفال في اعماقهم ، و صوت خادم له روح يوحنا المعمدان بينادي وسط الشباب بالتوبة ... نغمه تحسسك انك داخل وسط السما و قلبك راضي و مبسوط❤
اقولك ايه بس علي يوم الجمعة !؟...
اقولك ..
الي مش بيتمتع بيوم الجمعة في حضن الكنيسة ؛ لسه مدقش دفي الكنيسة ..
لسه مشفش الله الكأئن وسط شعبه ..
لسه محسش بيسوع البار حبيب الاطفال الصغار❤
تعالي الخدمة يوم الجمعة ؛ و هتدوق حاجة مختلفة بقلبك❤😉