[walaa farouk]

المرأة من السامرة (ملوك الثاني 6: 26-29)
في الأصحاح السادس من سفر ملوك الثاني 3 آيات يوصفوا قسوة قلب الأم انها علشان نفسها تضحى بابنها وتسلقه وتاكله
الحقيقة ترددت كتير اني اتكلم عن الشخصية دي لكن لقرب انتهاء سلسلة شخصية اليوم هنتكلم عنها
هي مرأة من السامرة لم يذكر اسمها لما حدث جوع شديد في الأرض كانت ساكنة مع واحدة ست تانية وكانوا عندهم ولدين
اتفقوا انهم كل يوم يسلقوا ولد وياكلوه فأكلوا ابنها وتاني يوم رفضت الست التانية فراحت تشتكي لملك اسرائيل
تعالوا نتعرف أكتر على شخصية المرأة دي ونشوف هنتعلم ايه؟
1- المرأة بلا زوج
لم يذكر أي سيره عن زوجها ومن الواضح انها كانت زانية كما ورد في قصة المرأتين الزانيتين مع سليمان الحكيم
فهي إشارة للنفس التي شردت بعيد عن راعيها
2- المرأة والأنانية
المفروض انها أم والواضح انه مازال طفل رضيع يعني المفروض تكون الأم حنونة أو على الأقل ما تبقى من أمومة عندها
لكن لما قارنت نفسها بحياة ابنها وسد جوعها اختارت انها تذبح ابنها وتاكله مع زميلتها
3- المرأة وطلب الحق الباطل
أوقات لما يضحك علينا الشيطان نجري نشتكي والشيطان يضحك ان القانون لا يحمي المغفلين
وفي الموضوع ده افتكر قصة شخص كان طيب يجمع الحطب كل يوم ويعطي الفقراء وكان كل يوم يلاقي الشيطان في الشجرة ويصارع معاه كل يوم ويغلبه وفي مرة عرض عليه الشيطان عرض ان كل يوم هيلاقي تحت المخدة 100 جنيه وما يتعبش ويشتغل فوافق وفضل فترة يلاقي كل يوم الفلوس وبطل شغل
مرة صحي ملقيش الفلوس راح للشيطان يتخانق معاه لكن المرة دي الشيطان غلبه
فالشيطان ضحك وقال كل مرة كنت تغلبني علشان انت بتحارب مع الحق انما دلوقت بتحارب علشان 100 جنيه
تعالوا نطبق اللي اتعلمناه
1- احرص دائما ان تكون تحت ظل مرشد روحي ولا تظن انك تستطيع وحدك أن تعيش بلا ارشاد
2- احذر ان تقدم مصلحتك وتدوس على أعز ما لك
لأن الأنانية بداية سلسلة من الخطايا تقودك للهلاك
3- لا تقحم نفسك في الشر ويضيع حقك وتجري تطالب بحقك الضائع
لأنك لن تجد من ينصفك