[walaa farouk]

صلّوا للمحبوسين جوه خوفهم وضلمتهم ومش قادرين يتحركوا..
للي محدش شايف وجعهم ولا حاسس بيه..
وصلوا للي مش عارفين يترجموا توهانهم ولخبطتهم ووجعهم لحد ولا حتى لنفسهم.

وصلّوا بالأكتر للمطحونين تحت افكار وشكوك تقيلة قاسية.
. للي تفكيرهم مش بيقف، ومخاوفهم بتزيد يوم عن يوم
.. وللأسف ماينفعش يصارحوا حد، لأن محدش هايفهم ولا هايهتم.

صلّوا للي حواليهم ناس كتير، بس من جواهم موجوعين بإحساس الغُربة والوِحدة اللي مابتتسدش ولا بتتعالج..

وصلوا للي جربوا قبل كدة بتخلوا عن دفاعاتهم ويعرّوا نفسهم ويتكلموا، بس للأسف اللي سمع ماطلعش أمين على الجرح ده وزوده أكتر، فا تراجعوا وخافوا واتعقدوا من الخروج للناس خوفاً من الجرح والخذلان.

صلوا لشفاء وجرأة للحركة تاني، ونور وسط كل الضلمة والتشتيت اللي موجود فيهم وحواليهم.

أنا فعلاً لسا بصدق أن الصلاة بتحرك ايد الله،
وبتغير الوضع اللي جواك قبل الظروف.

ومصدق أن في نور وشفاء وحركة لقدام وتعويضات في اعماق كل روح اتسرقت واتخربت زمان. ولسا مصدق أن الوضع ممكن يتبدل..

فيا صديقي اللي بتقرا وبتشاور عقلك تكمل في سكة الحياة ولا تبطل معافرة، ارجوك كمل.. في شفا وفرح ونوع حياة سماوي مستنيك تطلقُه وتصرفه من رصيد حب الله ليك.. بس كل متوقف على خطوة ايمان منك.. فا ارجوك -ورغم كل التعب اللي أنت فيه- تشدد!