[walaa farouk]

١٠ نصايح ذهبية للمقبلين علي الزواج

١-الله لا يفرض عليك ، و لا بيختار لك شريك حياتك ، انت اللي بتختار لنفسك ..

لو طلبت مشورة الله ح يظهر ليك صفاته ، و يعلن لك مشيئته الصالحة ، و يساعدك و يرشدك علي الاختيار ، لكن ح يسيب لك الحرية و المسؤولية في الاختيار الحر ..

٢- ممنوع التفويت : اوعي تعالج مشاكل الخطوبة بسرعة الزواج ؛ الخطوبة بروفة ، لو فشلت اكيد ح يفشل الزواج ..

٣-مراية العواطف عميا : اوعي المشاعر او الشكل او الغني يعمي بصيرتك ، كلها أمور وقتية، زي ورق الشجر اللي بيقع اول ما الشتا ييجي ؛
اساس الاختيار معينا نظيره ، يعني تشوفوا طباع بعض في بعض ، و تشبهوا بعض و تكملوا بعض في العقل و القلب و التربية و العائلتين و التدين و الخدمة ..

٤- اوعي تطلق علي الأخطاء اسماء تريحك : فتسمي البخل تدبير ، والشك غيرة و الغضب طيبة ، و العند شخصية قوية و تدخل الاهل الزايد حب..
دي عيوب قاتلة ممكن تنهي العلاقة..

٥- حاسب من "المتدين" و "المؤمن" و اللي قاعد علي طول في الكنيسه ..
طبعا كتير منهم ممتازين ، بس القلة - للاسف - بيخبي عقده و مشاكله تحت ستار التدين و بيبقي غير سوي و معقد نفسيا و عاطفيا ..

الاساس الروحي هام ، بس بجوار طباعه و تربيته و عيلته و مدي شبعه و استقراره النفسي ..

٦- في الارتباط الناجح خد اللي بيحبك قبل اللي بتحبه، اللي بيبذل الجهد علشان يسعدك و يريحك بكل قلبه مش يستغلك و يعذبك و يدوخك و يذل مشاعرك و يلعب بيك ..

٧-انت اللي في ايدك تنجح زواجك مع اللي اخترته ، و انت اللي في ايدك تفشله .. لكن لو حسيت انك مش مرتاح و مش فرحان و مش قادر تكمل و متردد ، يبقي توقف فورا ..

٨- ممنوع الاستعجال و العند و المكابرة : الاختيار الصالح عاوز تأني و مشورة صالحة و صلاة أمينة..

٩- اوعي تتزوج لان دي سنة الحياة ، او لان اصحابك سبقوك ، او ضل راجل و لا ضل حيطة او قبل ما يفوتك القطر او للاحتياج جسدى ..
الخناقات المحتدمة و الطلاق الصامت او الطلاق الحقيقي ما بقاش بعيد عن أي حد..

١٠- لو ملقتش شريك الحياة اللي يملا عقلك و قلبك و عينك في كل حاجه يبقي لسه موعد الزواج الالهي لسه ما جاش ، و تأكد انه ح ييجي قريب ..

و تأخير عاقل افضل من زواج باطل ..