[walaa farouk]

زي ما دخلت بعقلي و برغبتي ، ح اخرجك منه برضه بعقلي و برغبتي ..
كان بينا اكتر من الود و اقوي من الحب و اعمق من الصدق ،
اديتك فيها أعمق أجزاء من نفسي ، و استأمنتك بالكامل علي مشاعري ..
و اكتشفت ان كل ده كان حلم اني اتحب منك ،
و انك لا كنت بتحبني و لا حاجة، كان مجرد خيال عندي اني الاقي فيك اللي بادور عليه ..
انت ابن مصلحتك، جايز ، انا اللي اندفعت و اترميت عليك و ما لقيتش تحت رجلي غير هوا ، برضه جايز ..
لو لمتك ابقي ظلمتك لاني انا اللي فتحت لك الباب ،
و لو لمت نفسي ابقي برضه ظلمتها لاني مش ح اعاتبها علي طيبتها و حساسية مشاعرها اللي صدقتك ..
في الآخر اتعلمت ، و العلام عمره ما كان سهل ..
اتعلمت قبل ما اترمي علي حد اني اقدر اشبع من غيره ..
و اتعلمت اني اقدر استغني عن اللي بايعني و انا اشتريته ..
و اتعلمت امتي ادخل حد عقلي و امتي اطلعه و انا كبير و عزيز و كرامتي في أيدي. ..
و اتعلمت اني اعمل ده كله من غير ما أكره و لا اعاتب و لا أصغر نفسي و قيمتي ..
و اتعلمت ان اللي استرخصني ، اطلعه من حياتي و استبعده من ذكرياتي مهما كان الوجع ،
و اتعلمت ان حتي العتاب للي استقل بي ، ح يخليه تستقل بي اكتر
اطلقك يا من كنت صديقي من كياني، و احرر نفسي منك ، و استغني عنك من خيالي
، و اعفي عقلي من اجترار ذكرياتي ..