[walaa farouk]

تأملات_في_سفر_صموئيل_الأول
الأصحاح_العاشر
للكلام_وقت_وللصمت_وقت



في الأصحاح ده بنلاقي ان صموئيل بيمسح شاول ملكًا وقدام كل الشعب، والناس بتهتف ليه
لكن بيجي في وسط المشهد ونلاقي في ناس كمان بتتريق عليه وبتحتقره
وده اللي بنعدي بيه في كتير من الأوقات، بنلاقي في اللي بيأيد خطواتنا وبيشجعنا وبيمشي معانا، وبنلاقي اللي بينتقدنا وبيحتقرنا وبيرجعنا لورا
• ممكن نعدي بالموقف ده في الخدمة: لو تم اختيارك لقيادة خدمة معينة، هتلاقي اللي في ضهرك وبيأيدك وبياخد خطوات معاك وبيشجعك، وهتلاقي اللي بيحبطك وبيكسلك وبيحتقرك وشايف انك متنفعش
، في الحالة دي ممكن نتعلم من شاول ان تكون #كأصم وتسد ودانك عن كل كلمة سلبية بتسمعها،
وتتشجع وتكمل لقدام

• ممكن يكون وسط قاعدة مع أصحابك، وتبدأ فقرة مسك السيرة والتعليقات والتريقة والنميمة
، في الوقت ده لو مش هقدر أقوم واسيب القاعدة، محتاج اتعلم أكون في وسطهم
كأصم ، وأحاول افكر في أي حاجة تاني تخليني مركزش مع كلامهم

• ممكن في البيت او مع اصحابي، أوقات كتير بنعدي بمواقف بنشد مع بعض ، ولما باخد الكلام وادخله جوايا ابدا انا كمان ارد ونلاقي المشكلة بتكبر مش بتهدأ، وكل واحد بيزود وبيعلي على التاني في الرد وفي الكلام، لكن لما ببدأ اتعلم أكون #كأصم، بلاقي ان الهدوء في المواقف والتعامل بصمت حكيم وعدم الرد، بينهي الموقف بأقل خساير وبيبقى سهل نصفى ونهدأ، من غير ما يكون كل واحد بقى عنده خزين كلمات سلبية

• ممكن أكون في مكان او في الشارع والاقي ان في ناس بتحكي بصوت عالي او بتتخانق او بتشد مع بعض
، محتاج اتعلم ازاي تكون وداني عفيفة واكون #كأصم محاولش اركز بيقولوا ايه او بيحكوا عن ايه واروح انقله

اتشجع النهاردة ان تتعلم تكون أصم قدام كل كلمة وكلمة موقف ممكن يسرق منك سلامك وممكن يسحبك للخطية، #أصم مع كل صوت بيشجعك تروح مكان مش مناسب، #أصم وسط كل قاعدة مش مناسبة،
أصم قدام كل كلام سلبي موجه ليك.
ان التزم الصمت وعدم الرد على كل حاجة بسمعها وبنقلها، بيحفظ المجتمعات اللي انا موجود فيها من الخناق، ومن الانقسام، بيحفظ سلامي الداخلي من التاثر باي كلمة سلبية حد يقولهالي، لو أوقات كتير بنتشجع تعلم الكلام والدفاع عن الرأي والنفس، محتاجين أوقات تانية نتعلم الصمت بحكمة والحفاظ على الحق
الصمت مسيرة بس ينفع تبدأ من النهاردة، وافتكر من نقل لك نقل عنك