[walaa farouk]

تأملات_في_سفر_صموئيل_الأول
الأصحاح_التاسع
ابني_بنتي




أصحاح النهاردة بيدينا رجاء وبيكشفلنا أكتر عن محبة الله لينا، وتعامله معانا
بالرغم من أصحاح 8 بيكشفلنا ازاي الشعب عايز ملك يُملك عليهم، ورفضوا مُلك الله، بالرغم من تحذيرات الله وتحذيرات رجل الله صموئيل، نلاقي آية 16 في أصحاح 9 بتفاجئنا بنظرة الله للشعب، «غدًا في مثل الآن أُرسل إليك رجلًا من أرض بنيامين، فامسحه رئيسًا لشعبي إسرائيل، فيُخلص #شعبي من يد الفلسطينيين، لأني نظرت إلى شعبي لأن صراخهم قد جاء إلىَّ». نلاقي الله بيذكر 3 مرات في آية واحدة ان الشعب ما زال شعبه الخاص، لسة بيناديه شعبي.
أوقات كتير بيبقى عندنا صورة مشوهة عن الله، وأوقات بنتعامل معاه انه بشر زينا، بنفكر ان لما بنغلط بنفقد بنوتنا ليه، وبنفكر ان لما بقول لتكن_مشيئتي، ان بيديني ضهره وبيرفع ايده عن حياتي، لكن موقف الله مع الشعب وانه بيناديه شعبي، ده بيكشف لكل واحد فينا عن محبة الله وافتقاده لينا المستمر، الله مش بشر، ولكنه محب البشر الصالح، مش بيتعامل معانا موقف قدام موقف، ولكن هو عارف بضعف البشر، عارف اننا ممكن نغلط ممكن نزوغ ممكن نختار امور بحسب رؤيتنا ومشيئتنا، ولكن بتفضل عينه علينا، بتستمر رعايته لينا، بيستمر نداءه علينا، بيستمر يبعتلنا رسايل كتير ترجعنا ليه من جديد، من خلال عظة، او افتقاد، من خلال كاهن او خادم، من خلال آية حد يبعتهالي، من خلال موقف او تجربة تحصل في حياتي او في حياة اللي حوليا.

ربنا النهاردة بيطمن وبيشجع كل واحد مشي في طريق حسب مشيئته، او بعد عن حضنه وعن التواجد في محضره، انت بالنسبالي لسه #ابني ولسة #بنتي، وبيشجعنا ان ننرجع تاني عشان نتمتع بالبنوة دي، بيشجعنا ان لسة فاتح احضانه وبيقبلنا، لكن بُعدنا عنه هو اللي بيفقدنا الاحساس بيه، لكن مش بيغير رؤيته لينا ولا احساسه بينا.

مشهد تاني بيختم بيه الأصحاح، ومهم في طريقنا ونمونا الروحي
ان صموئيل بيقول لشاول خلي الغلام يمشي قدامنا، واقف انت هنا هتكلم ليك كلام الله
حياتنا الروحية عشان تفضل سخنة وبتنمو، محتاجين يكون لينا اسرار ما بينا وبين الله وبين ابونا الروحي، مش كل كلام اخده في خلوتي وقعدتي معاه او كل كلام بيني وبين ابويا الروحي، اروح اتكلم واحكي عنه، لكن يكون لينا اسرار واختبارات خاصة بحتفظ بيه في قلبي فيزداد حرارة على حرارة ويزود اشتيقاتي