[Mary Naeem]

التميز اكيد حلو و مفرح ، بس مش كل الناس تقدر علي كده..

مش كل واحدة ( او واحد) بارعة الجمال و تلفت نظر الكل ، و مش ضروري تبقي مشهور و الناس كلها تعرفك و تتصور معاك ..

فيه ناس قابلة شكلها و جسمها ووضعها ، و بتفرح بأقل حاجة ، و من طيبة قلبها ربنا مالي قلبها بالرضا و الشكر و راحة القلب.

برضه مش كل الناس تقدر تسكن في بيوت غالية ، او تصيف في اغلي حتة في مصر أو تلف العالم تتفسح ..
فيه ناس ساكنة في بيوت بسيطة و بتصيف في أماكن عادية و مبسوطة بالصحبة و بتبسط نفسها بأي اكل و اي فسحة ..

و مش لازم تقدر تشتري اغلي موبايل علشان تبقي محط أنظار الكل ، و لا لازم يبقي معاك اغلي عربية علشان تفرح..
فيه ناس فرحانة بموبايل بسيط و جميل بيقضي لها كل احتياجاتها ، و حتي بعربية رخيصة او حتي من غير عربية اصلا، هي مرتاحة و مبسوطة قوي ..

و لا لازم تبقي اهم واحد في الشغل و كل الناس عاملالك الف حساب .. فيه واحد "عادي" بس شايل قلوب الناس كلها بين ايديه بحبه و خدمته و ضحكته ..

الطموح اكيد حلو بس مرات بياكل راحة بالك ..

الإنسان "العادي" الراضي اريح قوي من اللي بيجري ورا اللي مش في ايده ، و بسبب المقارنة باللي في ايد غيره يتعذب و يعذب غيره ..

العادي الراضى مع راحة البال نعمة لا تقدر بمال ..