البابا كيرلس السادس
القديس البابا كيرلس اشتهر بأنه من عمالقة الروحانية , وأنه رائد من رواد صانعى المعجزات مثل شفيعه الشهيد مارمينا, و الحديث عنه يبعث فى النفس الشعور بعظمة عمل إلهنا القدوس فى الكنيسة . صلواته تساندنا ليكون لنا نصيبا معه فى المجد .
+++++++
دى معجزه حقيقيه حصلت لاختى الصغيره من حوالى 3 سنين
كان بابا عاملنا مرجيحه فى باب الاوضه بتاعتنا بكرسى بلاستيك و متعلق بحبال
فكانت اختى بتتمرجح وواقفه عليها فاتقلبت من فوق الكرسى و نزلت زرع بصل على نفوخها
ففضلت تصوط و ماما جريت ودتها للدكتور فبص على راسها لقا مكان الخبطه بارز اوى و لقا اختى بتخرف و متوهه
و هى وقتها كان عندها حوالى 9 سنين فقال الدكتور ده تجمع دم و ممكن يكون جالها ارتجاج فى المخ فروحى اعملى اشعه و تعاليلى لان الموضوع خطير
فراحت ماما دهنتلها راسها بزيت البابا كيرلس اللى بيتوزع فى عيده فى الطاحونه
و اختى يوميها كانت متوهه و بتخرف و سخنه و مكان الخبطف مورم فى راسها
و تانى يوم راحت عملتلها الاشعه الفوريه و يوميها لقيناها اتحسنت شويه و بطلت تخرف و فاقت شويه
و تانى يوم ماما ودتها للدكتور و معاها الاشعه فاديتهالو
ففضل يبص للاشعه و يقول اشعه مين دى و ماما تقوله بتاعت البنت فقالها يستحيل ازاى
قالتله بتاعتها بامانه فقلها امال الورم راح فين ده حتى لو بسيط ميروحش فى يوم و ليله
فقالها انتى عملتى ايه ؟
قالتله دهنتلها راسها بزيت البابا كيرلس
فقالها خلاص يبقا هوا عمل الازم .
بس و ليتمجد الرب الذى يعمل فى قديسيه