[walaa farouk]

لما حبني المسيح حبني من غير ولا شرط.
لكنك لما بتحبني بتحط ميت خط وخط.

لما حبني المسيح حبني من غير حَد.
ليه عايز تحبني وانت في جنب وأنا في جنب.

حبيبي حبني وأنا مختلف عنه تمام.
وأنت عايزني أكون زيك تمام،
عشان يكون في بينا إنسجام.

هو حبني وأنا مليان خطية ولا حاجة حلوة فيّ
وانت يا ويلي لو غلطت في حقك مرة،
على طول بتغير شكل حبك ليّ.

حبيبي حبني رغم رفضي ليه،
وصاحبي يمكن يحبني لما أعمل كل حاجة ترضيه.

دايماً نقول شعارنا وأحنا مسيحيين
أنه زي ما حبنا المسيح لازم نحب بعض
وبكده الناس هتعرف أد أيه بنحبه.
أشك أن أنا فعلاً بحبه لأني مش عارف أحبك،
أو يمكن مش قادر أحبك.

قال يوحنا الحبيب زمان أزاي تقول أنا بحب الله
وأنت مش بتحب أخوك الإنسان.
قال إذا كنت مش بتحب اللي شايفه بعنيك وبين ايديك.
أزاي مصدق نفسك وأنت بتقول أنك بتحب ربنا
اللي عمرك ماشفته بعنيك.

عارفين أحنا بنحب أزاي!!
أنا بحبك بشروطي.
وبالطريقة اللي أنا عايزها.
وفي الوقت اللي محتاجلك فيه.
وفي الوقت اللي أنت هايل فيه.
وفي الوقت اللي أنا ليّ مزاج فيه.

ولما تكون زي تمام
في المعتقد والفكر والسلوك كمان
.......بزمة بأه ده اسمه كلام!!

يا ترى هو ده بقى الحُب....!!!