[walaa farouk]

🌟 مش هنختلف إننا بنحب أولادنا وبنخاف عليهم، وبنبقى واثقين إن كل تصرف بنعمله عشان حمايتهم ومصلحتهم.
🌟 لكن أوقات مش بناخد بالنا إنه كلامنا ممكن يكون زي السهام اللي بتجرح قلوبهم وتكسر نفوسهم.💔
🌟 المراهق لما يتجرح بالكلام، بيكون جرحه كبير وبيفضل معلم فيه طول العمر.😔
👈 عشان كده تعالى أقول لك على ٧ حاجات متقولهاش لابنك المراهق:
1️⃣ أنت هنا في بيتي
الجملة دي كارثة بكل المقاييس، لأنها بتحسس المراهق إنه مش في مكانه الصح، البيت ده مش ليه، وهو مش بينتمي للعيلة.
2️⃣ (مش مهم أنت عايز إيه، المهم أنا عايز إيه
أنت كده بتوصل لابنك إنه مش مهم بالنسبالك، ورأيه ملوش قيمة!
استمرارك في الطريقة دي هيخلى ابنك يرفض يعبر عن مشاعره وآراءه، وهيفضل شايلها جواه،
وهتأثر على لغة الحوار ما بينكم!
3️⃣ (اعملها دلوقتي
أنت كدا بتصور لابنك -بالكلمات دي- إنك مش مهتم بحاجات تانية ابنك عايز يعملها، وإن الأولوية لاختياراتك أنت!
4️⃣ (من غير ليه)
عدم شرحك لأسباب قراراتك وأوامرك لابنك هيخليه رافض يسمع أي حد،
ويفتقر للقدرة على تفسير حاجات كتير بتحصل حواليه.
5️⃣ (أنت لسه عيل صغير، ملكش قرار)
كدا ابنك هيفضل يحس إنه طفل صغير، وهيقل شعوره بالمسؤولية تجاه تصرفاته، وده هيأثر بطبيعة الحال على ثقته بنفسه.
6️⃣ (تستاهل، عشان مسمعتش كلامي)
الجملة دي بتخليه يفتكر إنك سعيد بفشله، مع أنك قاصد تحميه!
لكن ده بيكون ليه تأثير سلبي، وبيمنعه من اكتساب الخبرات المختلفة.
7️⃣ (مش مسموحلك تعمل كده)
الممنوع دايمًا مرغوب، وبالتالي هتكون رغبته في معارضتك عالية جدًا.
المنع مش هو الحل للإصلاح، لكن المناقشة والتوعية هتساعده يعرف ليه الحاجة دي مضرة ليه.