[Mary Naeem]

ممنوع منعا باتا إني أسمح لأي حد يتخطي حدوده مع ولادي سواء بهزار او جد قولا أو فعلا ده غير مقبول

ممنوع منعا باتا أسمح لحد يناديهم بلقب أو صفه وحشة ( أسمر .. أكرت .. تخين.. مسلوع.. بضب.. اوزعه) أو حاجة في صفاتهم ( عيوطه .. زنان.. عصبي.. شقي.. معفرت).

ممنوع منعا باتا الهزار التقيل السمج بتاع طالع وحش لمين وليه مش حلو زي اختك و لا اخوكي و لا خالتك و لا عمتك و لا عم محمد البواب

ممنوع منعا باتا التعليق او السخرية علي المستوي البدني ( ماله مش قادر يجري كده ليه ... ازاي في السن ده و مبيعرفش يعوم.. ليه بينهج كتير ) ،
او التعليمي (ماله مش عارفه يقرأ.. هو مش شاطر ليه.. مبيعرفش ينطق ).
لان كل الكلام السلبي ده بياثر علي الطفل و بيفضل في المخ و العقل بيصدقه
و اثر علاج كلمه وحشه بياخد وقت و لازم قدامها ظ،ظ*ظ* كلمه كويسه عشان تزيلي اثر الكلمه الوحشه.

واخيرا ممنوع المقارنات باي طفل اخر و حتى لو اخوه.. لان كل طفل ليه السمات الشخصيه بتاعته و اللي بتختلف ومن طفل للتاني.. والمقارنات دي اول شيء مدمر لشخصيه الطفل و ثقته بنفسه.

- ياريت كل واحد يخليه في حاله لان دي قله ذوق.
بمنتهي البساطه امنعوا التنمر عن أولادكم هيحسوا انكم السند و الضهر و هتزيد ثقتهم في نفسهم و الكل هيعملك الف حساب و يفكر الف مره قبل ميقول اي كلمه على أولادكم.