[walaa farouk]

جملة ياما اتقالت و قتلت وراها قلوب و يتمت وراها مشاعر !!

ياما ناس انطرد قلبها من جواها لما تم تجاهلها ، و استكفوا بغيرها بعد ما كلوا خيرها ..

كده بكل سهولة ؟؟ كده كلمة تتقال تهد كل الأمان في حياة ناس بسبب خلاف او زعلة و أحيانا من غير اي تفسير غير القلب الجافي الناشف ؟؟

كده نبيع بعض ، بدل ما نتمسك بيهم و نقولهم "ما نقدرش نستغني عنكم " و "الدنيا كلها تزعل و لا نشوف زعلكم " ..

و علي فكرة فيه ناس لو قلتلها كده بتمشي فعلا و لا ترجعش !!
و فيه ناس لو ما قدرتش تمشي لأي سبب ، قلبها بيمشي عنا و بيبقي قرار نهائي..

و للاسف الاستغناء ده يا ما اتعمل في القريب و الحبيب قبل البعيد و الغريب..

الناس غالية قوي قوي ، اوعي تبيع حد لانك مش ح تعرف تشتريه تاني ، و لان اللي بيروح صعب قوي تعوضه ..

و لو فاكر انها كلمة تهديد و ح تعدي، تبقي غلطان، لان الباب فعلا ممكن يفوت جمل ..