قصيدة زى الألف للشاعر أيمن نادى اسحق
قصيدة : زى الألف
مش هابالغ وأقول انى كامل الأوصاف
لكن صدقينى أختلف عنهم كل الإختلاف
فى كل أمورى مختلف
مش مجرد شاعر بجمع الحرف جنب الحرف
والألف جنب الألف
ولو فاكرة انى علشان الشعر
بس بمسك قلم وكراسة
وانى خلصت دراسة
أحب أقولك انى لسة فى مدرسة
بدرس الكلمة المقدسة
اللى بتخلينى أفوق من الأوهام
وأخرج من الإنكسار والإنهزام
واصبح فى كل أمورى مختلف
منتصب زى الألف
منتصر زى الأبطال
وانتصارى مايتوصف
رائع وأروع ومبدع
وأجمل من انه يتشاف
ومش من الإنصاف
تشبهينى بيهم وتخلى
بــعـد إسـمـى كاف
انتى قبل اسمك دى آر
ولو مصرة توصفينى وتشبهينى
وعندك كل الإصرار
انتى مش عندك كل الأسرار
عندك جزء من المعرفة عن
الماضى اللى كان مضر
والحاضر اللى مش مر
والمستقبل سر
ميعرفوش غير ربنا وحده
وبعض القديسين بروح النبوه حسب وعده
سر الرب لخائفيه
انا حد لو هتوصفيه
قولى انى زى كل البشر
روحى لعبرانيين الأصحاح الحادى عشر
قولى انى رجل من رجال الإيمان الأبرار
إتحمل الذل والعار
والظلم اللى زاد
اتعرض للإطهاد
اتغلب على الأمراض
انا شخص عرف
ان الغم فى قلب الرجل يحنيه
زى ما الإنجيل وصف
ف أنتصب زى الألف
بقلم الشاعر أيمن نادى اسحق