[walaa farouk]

فيه دلع "مِرق" ، ماسخ، ضرره بالغ ، فيه نقدم حب يفسد العلاقات ، و يعلم التواكل
، و يضر شخصية الناس ، و يعلمهم الاستغلال و الابتزاز المادي و العاطفي ،
و يخليهم "يركبوك و يدوسوا كرامتك ..
و فيه دلع جميل ، كله شياكة في العلاقات و أناقة في المجاملات و حلاوة في المعاملات..
يقول الكتاب عن ربنا انه "يلاطفنا" «أَذْهَبُ بِهَا إِلَى الْبَرِّيَّةِ وَأُلاَطِفُهَا، (هوشع ٢: ١٤)
شوف كده ازاي بعت ملاك يلاطف ايليا و يربت علي يده و يعزم عليه بالأكل اكتر من مرة (١ ملوك ١٩) ..
و شوف برضه الملاك اللي بعته لبطرس ، و هو في السجن ازاي فكره انه يلبس نعليه قبل ما ينسي!!
و شوف ذوق السيد المسيح و هو بيشفي الأبرص ازاي لمسه رغم تحريم الشريعة ،
علشان يحسسه بالقبول ..
النوع ده من المعاملة الراقية مع الناس يسموه "دلع" المحبة ..
بص ازاي صاحب العربية من كتر حبه ازاي بيدلعها ، و يحط عليها لمسات عشقه لها ..
نفس الكلام مع ست البيت و هي بتزينه و تجمله بحاجات شيك لتظهر جماله ..
كده برضه لازم تدلع شريك حياتك و اولادك : كلمة حلوة ، اكلة جميلة ،
عزومة مفاجئة ، هدية غير متوقعة حتي من غير مناسبة ..
الدلع الجميل الموزون زينه في اللقاءات و جمال في التعاملات ، و شياكة في العلاقات