[walaa farouk]

الموت مؤلم... بيحير...بيوجع على كل المستويات...

موت الأحباب...
بيحرق القلب...الفراق مروّع... الفراغ مفيش حد بيملاه...الوجع مابيروحش للآخر أبداً... الوقت مابيشفيش.

الموت البطئ بسبب المرض...
مفجع... مخيف... عذاب بيبان كأنه مابينتهيش... للمريض وكل اللي حواليه.

والموت النفسي...
الآلام الناتجة عن الفراق...المرض والألم...الظلم...الشر اللي في العالم حوالينا...الترك والهجر...الخيانة... الخذلان...الوحدة...الخ

لكن فيه موت تاني فينا كلنا...
الموت اللي بسبب الشر اللي فينا احنا...عفونة مركزية الذات...الأنا...الكبرياء والأنانية...القسوة...الغضب...الفساد
... الشهوة...وكل واحد أقدر إنه يكمل من واقع خبرته الشخصية.

الطريقة الوحيدة اللي ممكن يكون بيها للموت الأولاني
معنى هي إنه يصير أداة لموت التاني...الأنا...يعني موت الموت.
ومفيش في التاريخ البشري كله علامة بتعبر عن النوع ده من الموت
أكتر من الصليب.

لكن لو الأمر وقف عند هنا، تبقى أكتر قصة حزينة في الوجود!
الموت مش النهاية...
بعد الموت فيه قيامة...فيه حياة.

في قيامة المسيح عرفنا إنه موت الموت حياة.

لو متألم...خلي كل ألم اتحاد بآلام المسيح...
لو بتعاني من الموت في أي صورة...خلي موتك أداة للموت
...لموت الموت اللي فيك.