[walaa farouk]

ما أضعفه ، شوية تراب بيرجعوا للتراب.. و شوية بخار يطلع في الهوا و يختفي بعد شوية ؛ صوت عالي و جعجعة و استعراض قوة ، و يجي فيروس صغير لا يري بالعين المجردة يعلمه الأدب !!

فيروس أجبر الإنسان علي الانصياع لطلباته..
قفل البلاد و هزم الاقتصاد ، و منع السفر و التنقل
، و لخبط نظام الكون ..

فيروس اعظم الدكاترة مش فاهمينه، ما لوش علاج للان ،
يتغير بروتوكول علاج مجرد "اعراضه" اللي مش فاهمينها اصلا كل كام اسبوع و أحيانا كل كام يوم ..

فيروس ما لوش قاعدة، يهاجم شاب صاحب اقوي مناعة و يتعبه ، و يهاجم شيخ فوق التمانين و يخف..

حتي التطعيم مش عارفينه بالضبط، مرة يشتغل و مرة لا ،
و مرة يقولوا عليه ممنوع و مرة يوافقوا عليه ..

كوفيد بيضيع الشم و التذوق ، و فعلا معاه كل حاجة
ما بقاش ليها طعم ، سبحان الله اسم علي مسمي !!

العلاقات ما بقاش ليها طعم و لا الفلوس و لا الفسح و لا البيوت ..

حتة الفيروس اللي مش شايفينه ده منع كل حاجة و اي حاجة : منع المقابلات و الفسح و السفر و السلامات و الاحضان !!

الفيروس ده خللي الناس نوعين : نوع مرعوب
و نوع متبلد علشان يداري رعبه ..

فيروس ما سابش حد في حاله : اصاب الرؤساء و الاغنياء و الوزراء و الأمراء و العظماء قبل الفقراء ..

و يحتفظ الله لنفسه بالقرار الأوحد : مين يخف و مين لأ،
و مين يقعد علي الارض و مين يسافر السما ..

و يكلم البني آدم اللي لسه بيكره و يتخانق و يعيش في شره
و يحسد و يلحد، و مقضيها فاهم انه هو كل حاجة و يقدر علي كل حاجة و هو و لا حاجة !!

الفيروس ده علمنا ان للكون خالق تبارك اسمه
، له الكلمة الاولي و الأخيرة في خليقته..

و ربنا قادر يحمي و يشفي و يطفي نار الوبا ، و هو القادر الاعظم ..