[walaa farouk]

🌸🌸نصايح ع الماشي 🌸🌸

عشان متكرهيش المطبخ وتكرهي نفسك 😍

🌷شيلى المولد اللى عالرخامة و ميتبقاش غير يادوبك الخلاط و الكاتيل و السكر و اخرك فى التوابل الملح و الفلفل الاسود غير كده اعملى قرار ازالة لأى حاجة عالرخامة و كله يتحط فى دولاب المطبخ

🌷 اوعى تقطعى حاجة عالرخامة سواء لحمة او خضار..تجيبى بلانشتين..واحدة للحمة و واحدة للخضار ويكون الفرق بينهم واضح منعا للخبطة..بتاعة اللحمة تتغسل كويس اوووى بعد ما تستخدميها

🌷 متشيليش حاجة لا فوق دولاب المطبخ و لا تحته...هتلم تراب بدهون يلزقوا فيها و هيبقى حالها صعب و بتعمل كركبة

🌷المطبخ له فوطتين..فوطة تمسحى فيها ايدك لما تكون مبلولة و نضيفة (نضيييفة) يعنى بعد غسل المواعين..غسل خضار او فاكهة لكن مش بعد تقطيع او تتبيل لحمة!!! و هتكون فاتحة عشان تاخدى بالك من وساختها اول بأول فتغسليها على طول مع باقى الهدوم....
و فوطة تانية تمسكى بيها الحاجات السخنة و برضه دى تتغسل كل كام يوم عادى مع غسيلك
و تفرقى بينهم يعنى مثلا تبقى واحدة سادة و التانية ملونة

🌷ارجوكى فوطة المطبخ اللى ملامحها ضاعت و دايما لونها بنى غطيس مسود و ريحتها معفنة بتلزق فى الايد حتى لو غسلتيها بديتول دي إرميها حاااالا
و اى فوطة مسحتى بيها دلدقة اى بتنجان او لحوسة تتغسل فى ساعتها على حوض المطبخ و لما تنشف تتحط تانى تتغسل فى الغسالة ياريت نعمل كده كل يوم بالليل عشان تفضل نضيفه وماتعملش ريحه ونشريها في البلكونه

و انسفى بقى فكرة انى امسح ايدى فى هدومى دى...حتى لو شايفاها نضيفة شكلا..لإنها اكيييد هتخلى هدومك تلقط ريحة بصل او توم او حتى ريحة صابون المواعين

🌷الاطباق و الكوبايات ممكن غسيلها يتأجل..لكن الحلل و الصوانى مستحيييل..دهونها هتنشف عليها و هيبقى غسيلها صعب و لو استنصحتى و بليتيها هتعمل ريحة مش لطيفة ويبقي عندك اتنين اسفنجه واحده للكبايات وواحده للحلل

🌷 متغسليش المواعين اللى دهونها قوية او فيها بقايا صلصة او صوصات بالسفنجة لإنها خلاص كده تاخد استمارة 6 لإن بتتوسخ جدااا و بتلقط ريحة..اى حاجة فىها دهون يبقى بالسلكة وبميه سخنه الاول خصوصا واحنا داخلين علي الشتا ميه دافئه تدوب الهون ونضافتها هاتبقي اسهل 🌸

🌷 كل يوم او يومين الحوض نفسه تغسليه بالسلكة عشان بيبقى على حروفه بقايا اكل بتعمل ريحة مش حلوة مع المية اللى دايما طايلاه..بلاش السلك الرخيص عشان ده بيسيب صدأ على كل حاجة
وبالليل نشفيه وحطي فيه اي نقط من زيت عطري زي زيت اللافندر أو زيت الورد من عند العطار دائما هاتلاقيه رحته مش وحشه وهاينعكس علي ريحه المطبخ كله .... وحطي ورد 🌷

🌷 الزبالة...ارجوكى بلاااش تبقى ملحوسة و متوسخة و طالع منها ريحة..مترميش فيها سوايل و لو حبكت تصفى السوايل دى الاول و بعدين تحطيها فى كيس من جوه كيس.. وانتى ادرى بزبالتك و عارفة بترمى فيها ايه..لو فيها مواد عضوية كتير يبقى تتربط ربطة حلوة و تترمى على طووول عشان الريحة
وتشيلي منها أي ابر أو زجاج متكسر ولو في تتحط الابره مقفوله والزجاج جوا كيس لوحده عشان مايازيش

🌷 اى لحمة او فراخ مطلعاهم يفكوا من الفريزر..يتسابوااا من بالليل في الثلاجه في طبق علي رف

🌷جيبي ورقه صغيره واكتبي عليها أي مزمور او تسبيح وحطيه قدامك علي اي حيطه في المطبخ عشان دائما تفكرك ولسانك مايبطلش صلاة صدقيني البركه هاتبقي في اي حاجه بتعمليها❤️



دمتم جميلات ❤️