[walaa farouk]

- يارب شغل في أي مكان! أي شغل،
يجي الشغل بس، و تشتغل،

و مع الوقت....!!
شغل مُقرف مش مرتاح مواصلات و بهدلة

- طيب لو الشغل قريب من البيت: شغل مُمل، حاسس اني مش شايف الدنيا!!

- طيب لو الشغل جوا مصر: عايز اسافر بقى، والحق اعمل فلوس زي اللي سافروا، انا مش لاقي نفسي هنا.

- طيب لو الشغل برا مصر: تعبت من الغربة واني عايش لوحدي، و حاسس إني ألة بتجيب فلوس وخلاص وعمري بيتسرق.

- طيب لو شغال في مكان تحت إدارة حد: نفسي اشتغل لوحدي، زهقت من إن حد هو اللي بيديني أوامر وبيتحكم فيا!

- طيب لو شغال لوحدك : كان نفسي ابقى شغال في مكان و متحملش كل المسؤليات دي.

- و تستمر دايرة التذمر ونكران النعم! عارفين المشكلة فين..؟!! بإختصار.. إننا عايزين نعمة بدون "مُنغصات" و أول ما تيجي المًنغصات بنفشل في امتحان الشكر. و تبقى الحاجة اللي كنت بتبكي وبتدعي ليل نهار علشان تجيلك بقت هي الحاجة اللي بتتمنى زوالها لمجرد إنها جت بشوية مُنغصات مع أن دا طبيعي جدًا! احنا عايشين في الدنيا مش ف الجنه، ف طبيعي يبقي في حاجات تنغص علينا حياتنا!

-- ربنا بيستجيب لنا، و بيكرمنا، بس إحنا اللي مُتخيلين الدنيا زي الأفلام كل حاجة بتيجي سهلة و على المزاج بالظبط. حاول من وقت للتاني تفتكر النعم اللي موجوده حواليك، والوضع اللي مش مناسب ليك بدل ما تكون دائم التذمر بسببه، اعمل خطه عشان تغيره، بس لحد ما يتغير، أشكر ربنا علي نعمه. عشان النعم تدوم ⁦❤️⁩