[walaa farouk]

كل يوم فواتيرك المادية لازم تندفع : فواتير الكهرباء و الغاز و المياه و كارت الفيزا و مخالفات السيارة و الإيجارات و اي التزامات شهرية و سنوية كلها ..
و لو ما دفعتش تتكوم عليك و تندفع بالغرامة أو بالقانون ، ما تقدرش تهرب منها ..

كده برضه فواتيرك النفسية و الروحية لازم تندفع ..

لو شهرت مثلا بحد او ظلمته او اهنته و ما رديتلوش اعتباره و صلحت اللي عملته ح تبقي عليك فاتورة "فضايح" أو فاتورة "ظلم" أو فاتورة "إهانة" متأجلة ، ح تدفعها من سمعتك و من كرامتك ..
ح تقف مستغرب ساعتها و تقول "مظلوم" ما عملتش حاجة..
بس لو فتشت في الماضي ح تلاقي حاجة من دول عملتها و محطوطة في حسابك و متسجلة باليوم و الساعة و امتي و فين ..

و لو اخدت حاجة أو فلوس أو مكان أو ملكية مش من حقك و ما رجعتهاش لأصحابها برضه متسجلة عليك .. و الا الايام ح تلف و حاجة ملكك ح تتاخد منك و تبقي مش فاهم "ليه الظلم ده" ؟؟ .. و اتاري اللي انت شايفه ظلم طلع "منتهي العدل" ، و انت بس دقت من نفس الكأس، و الجزاء من جنس العمل ..

عاوز نصيحة حد بيحبك : سدد كل فواتيرك بتاعة امبارح اول ما تفتكرها و بتاعة النهاردة اول بأول..

اصلك كده كده ح تسددها ، و لو ماكانش النهاردة ، ح يبقي بكره و بالفوايد المضاعفة..

تنام مرتاح البال ..
و راحة البال و الضمير أغلي من كنوز الدنيا ..