[walaa farouk]

١- اللي وقت ما تتأزم علاقتك معاه يقلب و يبعد و يفشي سرك و يشهر بعيوبك ، لا حبَك و لا ح يحِبك .. البعد عنه مكسب ما بعده مكسب ..

٢-اللي يفتح لك قلبه و يحكي لك سره و يكشف لك ضعفه ، يبقي وثق فيك زي الغرقان في البحر .. خليك علي نفس حبه ليك و ثقته فيك ..

٣- بعض الناس بي تشوفهم من غير و لا كلمة "تمرض" ، و فيه ناس لقياها شفا و دفا و عفا .. نقي من معارفك الطبيب و الدوا ، و ابعد عن المريض و العيا..

٤-فيه ناس الزمن غيّرهم و قسّاهم ، و فيه ناس الزمن ما قدرش علي صفاء قلوبهم و جمال عشرتهم ؛ دول اوعي تفرط فيهم !!

٥- الصديق الحقيقي نادر الندرة !! و انت معاه بتبقي "إنت" من غير ما تتزوق و لا تخاف و لا تحسب كلامك و لا تخبي اللي جواك ..

٦- من كتر ما بتكره حد بتتحول من غير ما تقصد لنسخة طبق الأصل منه ؛ الكراهية نار اول ما بتحرق تحرق صاحبها..

٧- ما حدش عاجب حد ، انت مش عاجب الناس، و الناس مش عاجباك .. اللي يبص علي عيوبهم بس "مسكين و تعيس" ، و اللي يشوف حسناتهم بس "مخدوع " و "ساذج" ، و اللي يعرف يقبل و يفوت و يقرب و يبعد "حكيم " و "سعيد"

٨- كل واحد شايف ان الناس نصيبهم أفضل منه ، والناس شايفة ان نصيبك احسن منهم : الرضي و القناعة و الشكر هو الحل ..

٩- مش كل ذكر راجل .. الذكر نوع و الرجل شهامة .. و مش كل انثي امرأة، الانثي نوع و المرأة عقل ..

١٠ - لا تشحت حب حد و لا تطلب إهتمام والسؤال عليك من حد .. احتفظ بكرامتك و عزة نفسك .. اللي بيحبك يحبك بجد يدور عليك زي ما بتدور عليه ..

١١ - الناس زي الشمعة اذا اتقنت حملها تنورلك ، و لو ما عرفتش تحرقك و تبهدلك ..

١٢-فيه علاقة زي "الارض الجيدة " تستاهل التعب و الزرع و السقي.. و فيه علاقة زي "الارض المالحة" مهما فلحتها، تموت أي زرع ..
اكتشف بنفسك اي ارض قبل ما تضيع وقتك و سلامك و راحة بالك ..