[walaa farouk]

✍أنا عمري ما انبهرت بالأفراح ولا المشاعر اللي بشوفها في الأفراح والضحك والاحضان والنظرات والهمسات ، طبيعي .. طبيعي جدا يكون ده المشهد السائد ..

إنما انبهاري الحقيقي بشوفه في راجل راجع م الشغل ميت م التعب بس شايل حاجات هتفرح مراته وولاده .

انبهاري بيبقى بست حامل على آخرها وواقفه تطبخ أكله صعبه لجوزها عشان نفسه فيها .

بنبهر براجل مر على جوازه 15 سنه ولسه بيقول لمراته يا حبيبتي .

وبنبهر بست بتعد جوزها من ضمن ولادها .

انبهاري بيبقى براجل عدى الخمسين ولسه عنده من الحب ما يكفي لأنه ينزل يختار مع مراته هدومها .

أو بست عندها من الامراض ما يتكفل بالقضاء عليها بس فاكره مواعيد دوا جوزها بالثانيه .

بنبهر براجل بعد سنين بيبص لمراته بفخر وكإنها أهم إنجازاته .

انبهاري بيبقى ب اتنين دب الشيب ف راسهم وقاعدين يقاسموا بعض كوباية شاي وحكايه قديمه حفظوها صم بس لسه بيلاقوا فيها ضحكه .

بنبهر براجل لسه فاكر عيد ميلاد مراته حتى بعد م تمت الستين .

بنبهر بست مبترضاش تاكل حاجه بره البيت طالما جوزها مش معاها عشان هي عارفه أنه بيحبها .

بنبهر بإتنين كل واحد فيهم رجله مش شايلاه بس لسه قادر يسند اللي معاه ويتسند بيه .

بنبهر ب جد وجده قاعدين يحكوا لاحفادهم في سباق مين فيهم بيحب التاني اكتر .

بنبهر بالاتنين اللي بيتوهوا من غير بعض ومبيعرفوش يتصرفوا لو حد فيهم في مكان لوحده وكإنه ناقصه نفسه .

بنبهر باتنين بيتعازموا ع الموت عشان كل واحد فيهم مش متخيل أنه يعيش من غير التاني .

بنبهر براجل لسه بيزور مراته اللي ماتت من 10 سنين ، وست لسه بتكتب لجوزها جوابات رغم انه طلع السما من مده ..

الفرح بيخلص في ساعتين ، بس الحب مبيخلصش حتى لو الدنيا اديتك 100 قلم على وشك تفضل تقاوح عشان لسه لك في الدنيا أمل بيمثله الحبيب وحتى لو راح الحبيب دنيا تانيه تفضل روحك ملزماه وكأنه مغابش دقيقه.!

الحب تفاهم وتحمل مسؤليه