[walaa farouk]

الرزق انواع كتير قوي من يد الله "الرزاق" ، و ربنا يوسع رزقك كمان و كمان ..

الصحة رزق ، و ربنا يكفيك بهدلة المرض ، و لو تعبت ينعم عليك بالطبيب الأمين و الدواء السليم
، و لو اتأخر شفاك يصبر قلبك و يرزقك باللي يحبك و يقف جنبك و يهون عليك ..

الاصحاب رزق ، لما تلاقي اللي يخلص لك و يقف جنبك في ضيقتك، و ينجدك في ازمتك..

و حب الناس كمان رزق ، لما تلاقي القبول منين ما تروح ، و ترحيب و احترام و ابتسام ،
و ربنا "يحبب فيك خلقه" ..

و اللسان الحلو رزق ، لما ربنا يحط في فمك "جوهرة" و في لسانك "سكرة"
، فتشجع الكل و تفرح الكل و تساعد الكل ..

و الجوازة المرتاحة رزق ، زوجة فاضلة و مخلصة و قنوعة ، أو راجل شهم و امين و ابن ناس
، وولاد يريحوا قلبك و يعيشوا في طوعك و طاعتك..

و المشاكل المحلولة رزق ، تيجي علي قدك ، خفيفة ليها اخر ،
تلاقي لها مسالك و مخارج سهلة ، و تنتهي علي أهون سبب ..

اما راحة البال دي رزق ما بعده رزق .. تنام بالليل مرتاح و متدفي
، ضميرك مرتاح ، لا مزعل حد و لا واكل حق حد و لا متهدد و لا متكدر ؛
تنام مبسوط و تصحي مطمن و راضي و متراضي..

نيجي للفلوس احب اقولها في الاخر..
اصل آخر الرزق فلوس لأن كل اللي فات أغلي من اي فلوس ..

لكن هي برضه رزق ، لما تيجي من يد الله، و انت مش طمعان في حد ،
و تدي الناس في شغلك اكتر ما تاخد ، و ما تاكلش حق حد،
و تطلع منها خير و عطا للغلبان و الحيران.. تاخدها و معاها بركة و رضي
و تصرفها في الخير و تسعد بيها مع بيتك و حبايبك ..
تيجي لك و مكفياك و انت شاكر و قانع . و مهما قلت البركة تغطيها و تفيض و تزيد ..

و في السنة الجديدة ٢٠٢١ ، صدقت الدعوة الجميلة "ربنا يوسع رزقك" ..
سنة جميلة ربنا يريح فيها قلب الجميع و يحقق كل الاماني
و يوسع رزق كل واحد في الدنيا بالخير و الهنا و البركة ، و ينعم علي العالم بالشفا
و العفا و الصحة و الأمان..

كل سنة و كل لحظة و الجميع باحلي فرح و خير و سلام