[walaa farouk]

من فترة كنت في قداس واتفاجئت بالشماس اللي عالمذبح.
.. اه انا عارفاه كويس.. ده واحد اكبر مني بكام سنه بس من شقاوته هو وشلته انا فاكراه كويس... كانوا صايعين بتوع بنات وبيشربوا سجاير واكيد اكتر ،عيال بتوع مشاكل، كل الناس مجمعين انهم مش هينفعوا،
الواد ده واصحابه ربنا هداهم كلهم... بقوا رجاله جدعه فاتحين بيوت وعندهم عيال ، افتكرت اول ما دخلت خدمه ثانوي وبقي نظرتي لبعض البنات انهم كده كده ضايعين هنقرف نفسنا معاهم ليه!! وقتها الخادمات الكبار ردوا عليا بجملة "في #الكبر_يتأصل_يعقوب
" قالولي يعقوب اللي كان ضلالي ونصاب ،
شويه بيضحك علي اخوه وياخد البكوريه بطبق عدس
وشويه ينصب علي خاله بوحم الغنم لما كبر من كتر قداسته
قابل ربنا وش في وش وصارعه ومن كتر شوقه وحبه ليه مسك فيه ومرداش يسيبه ،اللي هو انت رايح فين ده انا ماصدقت لقيتك ، قالولي البنت اللي انت شايفاها ضايعه دي ،تعالي شوفيها بعدين هتلاقيها ست بيت زي الفل يعتمد عليها وعندها عيال مربياهم كويس
ومفرحه قلب ربنا، وحكولي عن بنات كتير قابلوهم
في سنييين خدمتهم ميقلوش عن الانبا موسي الاسود في التوبة ، ازاي بيحصل ال dramatic change ده !!
يمكن كلمه سمعوها بالصدفه من خادم ولا خادمه ...
ويمكن استهزأوا بيها وقتها ... بس اللي احنا مصدقينه
ومختبرينه ان كلمه ربنا مبترجعش فاضيه .
. دلوقتي ، بعدين ، مش بتاعتنا .. عياله وهو الأدري بيهم ..
. هو فاتح حضنه وكل شويه ينغزهم ويفكرهم بيه حتي لو بقلم شديد ..
محدش كبير عالغلط ، ياما عملنا بلاوي عمر ماحد يصدقها عننا ، الفرق الوحيد ان ربنا ستر علينا ومفضحناش
فِي_الْمُسْتَقْبِلِ_يَتَأَصَّلُ_يَعْقُوبُ. #يُزْهِرُ_وَيُفْرِعُ_إِسْرَائِيلُ، وَيَمْلأُونَ_وَجْهَ_الْمَسْكُونَةِ_ثِمَارًا.( إشعياء6:27)