[walaa farouk]

احلي استثمار ..

احلي و اربح و أعظم ربح هو "الاستثمار في الناس" ..

اروع من اي بنك أو تجارة أو بورصة أو شركة ..

استثمار الناس يعني تتاجر جواهم بالخير و العطاء و السند و الإحسان..

الاستثمار ده يعني تحب الكل و تكلمهم اجمل كلام ،
و تشجعهم علي قد ما تقدر ، و تفرحهم و تخللي الدنيا حلوة قدامهم..

يعني تخدم الكل و بقلبك ، و تساعدهم قد ما تقدر
و لو بكلمة أو بنصيحة او بمعلومة
، او انك تدلهم علي اللي محتاجينه ..

يعني تصالح المتخاصمين و تريح التعبانين ..

يعني انك "تجول تصنع خير" زي السيد المسيح ،
تكون حمامة سلام و حب مع الكل ..

استثمار في الناس يعني تسيب جوة كل واحد "حبة حب
" و "زرعة خير" ، تحببهم في نفسهم و تصبرهم علي صعوبة الدنيا
و تخللي أيامهم حلوة ، و توريهم مصداقية التدين
و الأخلاق اللي بتتكلم عنها ..

هو ده مكسبك الحقيقي اللي ح يدوم ليك و فيك
، استثمار باقي قدام الله و الناس ،
بيعيش عمرك و يتوارثه اولادك و اولاد اولادك
و الي منتهي الاجيال ، و بيوصل معاك سيرة عطرة لسماء السموات ..