[walaa farouk]

حاسب من "أستاذ و رئيس قسم الورطة" ..

ده بقي يا سيدي واحد متخصص يرميك في اقرب ورطة و "يخلع" ..

يلبسّك في اقرب حيطة ، و يلبخك بالكلام و التعاطف و أحيانا بالحيلة، المهم "تخّيش" في المشكلة و يسيبك مزنوق و يجري طيران!!

الورطة دي مشهورة في علاقات الحب و الهيام و الغرام .. واحد أو واحدة ما تنفعكش (و ممكن الاتنين يورطوا بعض علي فكرة) ، و يقعد يشبك حبال المشاعر حواليك لغاية لما "تندلق" علي وشك في "ورطة الاحاسيس" ، و تلاقي نفسك مضطر تكمل مع حد ما ينفعكش أصلا..

الغريب انك لو حاولت تسيبه و تمشي ، يتمسكن و يستضعف و يتهمك بقلة الأصل .. و لو صممت يهددك بكل اللي يقدر عليه، و كتير يسيبك غرقان في عواطفك و يعاقبك ببعده عنك ..
يعني يورطك و يطير وقت ما هو يقرر !!

الورطة دي تلاقيها برضه لما حد يطلب منك "خدمة" و ينادي شهامتك و نبلك .. و انت بكل نية طيبة "تشيل الليلة" ، و تكتشف انه علشان يحل مشكلته لف حواليك حبال مشكلته هو .. و بعد شوية يسيبك غرقان و عرقان و عيان و يسيبك علي اول ناصية ..

ورطة "الورق" دي كمان ورطة مشهورة جدا .. واخد يمضيك علي كلام او وصل أو شيك أو اعتراف أو تقرير لمصلحته .. و انت وقت "الاحراج " تلاقي ايدك "عميا" و تفوق بعد فوات الأوان..

زيها تمام ورطة "الكلام " و "الوعود " اللي تطلع منك وقت تسرعك ، و تتفاجيء انك مش قد كلامك و لا تنفيذه، و علشان تبان راجل "تتحشر" و تتورط اكتر و اكتر ..

نفس الورطة دي بنشوفها في المشورة .. عاوز يخليك انت تاخد له قرار في مشكلته ، و تشيل عنه المسؤولية ، و لو فشل يبقي انت السبب و انت اللي ضيعته و كنت السبب في تعاسته ..

اوعي تورط نفسك مع حد .. ادرس الموضوع كويس قبل ما تقول رايك ..

و اوعي تشيل مسؤلية عن حد ، "معاه" ممكن ( و بحرص شديد و حكمة كبيرة ) ، انما "بداله" لآ و ألف لأ..

و لو اكتشفت انك مش عارف حل، أسأل حد فاهم و انت فاكر الآية الخالدة " الخلاص فبكثرة المشيرين (أمثال ١١: ١٤)"

اوعي تتكسف من الاعتذار ، لأن "أستاذ الورطة " وقت الجد ح يسيبك لوحدك ..