[walaa farouk]

البركة وفيرة و متدفقة من السما علي كل قلب و كل بيت..
فيه ملايكة شايلاها و دايرة توزعها طول اليوم ، و عندها فايض يكفي الكل و يفيض..
البركة دي يا بتيجي عند قلبك أو عند بيتك و يا تدخل يا تهرب ..

اللي بيشد البركة كل خير و حب بتعمله ، كل خدمة و تعب لأجل الناس
، كل كلمة حلوة تقولها من قلبك ، كل صلوة متضعة تايبة ترفعها ،
كل تسامح و احسان و غفران لحد مضايقك ، كل تواضع و مودة للناس
، كل صبر و شكر وسط الضيق ، كل طاعة لربنا و لكلام كتابه،
كل تسبيحة و ترنيمة و صلاة مالية لسانك و بيتك..

تلاقي زحمة ملايكة طارت شايلة بركات السما و عطايا النعمة
و جايباهالك : نعمة و قبول من الناس و نور و رضي و تعويضات و مكافآت و رزق و حماية ..

علي الطرف التاني نفس الملايكة ح تهرب منك و تاخد البركات المكتوبة علي اسمك لحد تاني
، لأنها ما تقدرش تستحمل الغلط إللي بتعمله و لا تشوف الشر اللي حواليك ..

مواقع شريرة بتشوفها، مناظر ردية و شهوانية بتتفرج عليها ، قعدات شريرة مع ناس ردية
، قلب حقود، كلمات غضب و شتايم و نميمة، خناقات و نكد و زعل
، عدم غفران و استمرار للحقد، حسد و تدبير الشر للغير ..

يا بختك يا قلب ياللي الملايكة تتمني عشرتك، يا اللي حامي عينك من نظر الشر و النجاسة
، و حامي لسانك من النطق بالشر و من صنع الردي للغير ..

و يا بختك يا بيت اللي الصلاة و الترنيم و الحب و السلام و الصلح ماليك و خارج من شبابيكك،
تلم حمام السلام حواليك ، و تشد ملايكة البركة ليك