[walaa farouk]

منعوك من الفضفضة؟؟

منعوك من الكلام ، من الاحلام ، من السلام ..

منعوك تقول اللي جواك من يوم ما وعيت علي الدنيا ،
تحت بند الخوف و الحرام و العيب ..

ممنوع تعبر عن نفسك، لا تزعل و لا تغضب و لا تخاف و لا تحب
و لا تعمل اللي في نفسك و لا تقول اللي جواك ..

منعوك انك تكون نفسك ، و تعيش نفسك و تكون نفسك ..
منعوك من الاحساس و التعبير خوفا من الغلط ، فغلطت اكتر ..

منعوك من العياط لان الراجل ما بعيطش
، و منعوك من الخوف لان الكبير ما يخافش، و منعوك من الحزن لان المؤمن ما بيحزنش..

منعوك ، و بعدين انت اللي منعت نفسك من اي مشاعر .
. كتمتها و دفنتها و حبستها،
و قاعد تتحرق في صمت و انت مش بتطلع اللي جواك ..

يا مشاعري المكتومة ياما وحعتيني ووحشتيني
.. ما لقيتش حد يقدرها و لا يكبرها و لا يشرحها
و لا يسمعها و لا يعذرها ..

كان نفسي بس اتكلم ، بدل ما اتحبس جوه نفسي
.. من كتر ما دورت علي اللي يسمع حتة مني و ما لقيتش، اتكتمت و اتحرمت و اتحرقت و اتقهرت ..

ما بقيتش نفسي ، بقيت واحد تاني ، بقيت زي ما الناس عاوزاني..

مش عارف اغضب و لا اعاتب و لا اشرح اللي جوايا ..

لا باعرف اقول حد زعلان منك و لا صعبان علي منك،
و لا حتي نفسي احبك و اقرب منك ..

و لا باعرف اغضب و لما اتجرح اتكلم و اتألم ،
و لا من حقي ابعد عن اللي كاسرني ، و ابقي مجبور علي عشرته و محبوس تحت رحمته ..

من كتر ما اتصدمت في الناس اتحرمت
و اتكسفت اتحرقت و انسحبت و اتسحلت..

لكن ح افضفض..

لو مش لاقي حد يسمعني ح افضفض مع نفسي و خلاص ..

مش ح اسيب وعلي يكويني و يشقيني ، و ح اتكلم يعني ح اتكلم ..

و لو ما لقيتش حد ، ح اخد فضفضتي و اخش اوضتي و افرش نفسي قدام ربنا ، الوحيد اللي بيحبني زي ما انا و بيسمعني و بيقبلني زي ما انا بمرها و حلوها..

مش ناوي اعيش غريب عن نفسي ابدا ،
ح افضفض و ح اكون نفسي مش حد تاني ..

ح تفضفض زيي ؟؟