[walaa farouk]

البجح في اللغة (راجع معجم المعاني الجامع ) من "فرح و افتخر" ، و تستخدم للي فرحان بنجاحه و تفوقه ..

و مع الايام تغير استخدام الكلمة في الموروث الثقافي لمن "تفاخر و فرح بقلة ذوقه و عديم ادبه" !!

و معاكم ١٠ تعريفات للبجاحة 😊😔

١-يتصرف في حاجة غيره كأنها حاجته ، و يتعامل مع اللي مش ليه علي انه حقه ..

٢- ما يستأذنش قبل ما يتصرف في اللي مش ليه ،
و يتعامل علي اللي للناس علي انه حق مكتسب ..
و لا بيراعي كلام و لا سن و لا مقام و لا بيحترم خصوصية و لا عنده لياقة و لا كياسة ..

٣-يتمسكن لحد ما يتمكن، يعني يلعب علي الهادي لغاية ما تآمن له ،
و بعدين يسيطر و يغجر، يركب و يضرب..

٤-يكلمك في اللي ليك علي انه بيؤمرك، و أن عليك واجب الطاعة و الولاء،
كأنك عبد و اشتراه و بيربيه بعصاه..

٥-يقتل القتيل و يمشي في جنازته ، و يعمل العملة و يلبسهالك ،
و بعدين يجي يواسيك و يعمل نفسه رحيم و قال ايه "حاسس بيك" ..

٦-فاقد للذوق و اللياقة في الكلام ، يشتمك و يهينك و يضحك بعدها و لا كانه عمل لك حاجة ..

٧-يطلب اللي عاوزه علي انه امر واجب النفاذ ،
و يزعل قوي لو اعتذرت لأنه مش في استطاعتك..
و ياما بيعمل كده بكل "بجاحة" و تكون لسه قاصده في حاجة بسيطة جدا بالنسبة له ،
و هو خذلك و باعك عند اول ناصية..

٨-عمرك ما تقصده في خدمة و يعملهالك.. بالكتير قوي يوعد
- ده اذا وعد- و يخلف و يهرب و يتهرب و لا يحس باحتياجك و لا بكسرتك..

٩-يلاعبك زي "اليويو" ، يقربك منه و يعشمك و اول ما تآمن له يبيع و بشتري فيك و علي الملأ..

١٠-اول ما يتكلم يجيب سيرة الكل بالردي و الشر ، و يعمل نفسه هو اللي صح..
و قال ايه مطلوب تصدق انه ح يتكلم عليك حلو !!
و من بجاحته يقنعك انه جنبك و هو ياما أذاك و ضايقك و اتكلم عليك بالسوء و اتمني لك الفشل ،
و الكارثة انه عارف كده ، و انك انت عارف كده ..

الذوق و الأدب له ناسه ، و عملته كسبانة عند الكل حتي و لو بعد حين..

و البجح مفضوح ، مهما داري و خبي، و عشرته خربانة و عملته خسرانة و لو بعد حين..

و صاحب الذوق كسبان و لو بعد حين، بيضارب في بورصة الأخلاق ..
و دي بقي بورصة ليها قانون ثابت : تخسر في الأول جايز
، لكن ربحانة مع الزمن ، فيها تكسب راحة قلبك و ضميرك و بالك و رضي ربك
، و في الاخر رضي الناس و احترامهم جاي اكيد و لو بعد شويتين..
.
. د.مجدي إسحق