[walaa farouk]

---------------------------------

يا عدرا يا أم ربّي إنت حشيشة قلبي
إنت يا عمود النور إنت يا عطر البخوّر
إمّي العدرا عينيني بصلاتك لا تنسيني
وخلّيك فوق راسي وتشفّعي بخلاصي
حطّي إيدك عالصّخرة بتطلع قرباني خضرة
بتطلع قرباني هنيّة بركه لكل البشرية
باركيلي إمي وبييِّ وكل مين تعب عليِّ

أعطيني صبر وقناعة اليوم وبكرا و كل ساعة
إمّي العدرا عزّيني توب الطهارة لبّسيني
تا إبقى صلّي بقناعة وسامح غيري كل ساعة
يا عدرا الفوق راسي عينيني وقت خلاصي
خلّيني شمعة طولك تا يفيض علييّ نورك
مار يوحنّا يا ملاك ساعدني وقت الهلاك
إنت جاري وجيرتي فكني من همي وضيقتي
يا ربّي مسيت وتمسّيت و يا ربّي فيك تقوّيت
إنت عظيم الرجا بتمنع كل شدّه وبلا
خالق الأرض والسما إمنع عنّا كل خمول
و كل شر طالع من الأرض ونازل من السما نزول
بالنعمه الإلهيّة والسعادة الأبدية

يا ربّي إنعم علّيي وعالأخوي المسيحيّة و غير المسيحية
يا ربّي كن لي سموح لمّا بيجي طلوع الروح
ولمّا بغمّض هالعيون عليّي يا ربّي لا تكون
بخاف القبر وعتماتو بخاف الدود ونهشاتو
بخاف الميزان وميلاتو يلطف الله برحماتو
يا ربّي لا تتركني يا ربّي لا تموّتني
لا حريق ولا غريق ولا مشلوح عالطريق
لكن موتني موتي هنيّة و قربانة طريّة
راسي عا فراشي والعدرا فوق راسي
إمّي تترضّى علييّ والعدرا تتشفّع فييّ
ومشحة كبيرة للزنّار وسبع صلبان ليل نهار
حطّيت راسي عا فراشي سبع صلبان فوق راسي
منها كبار ومنها صغار يحرسوني ليل نهار. +++