[walaa farouk]

١٠ تعريفات للغباء - مذكرات غبي "عفوا"

١-انك تصدق ان رأيك بس اللي صح و كل رأي تاني ما يستاهلش حتي انك تسمعه ، و انك تصدق كل اللي يتقال أو يتنشر من غير ما تدقق و تشغل مخك ..

٢-انك تبقي عارف جوه نفسك انك غلطان و تكابر و تعاند علشان لا تبان غلطان و لا تعتذر..

٣-انك تعيد نفس الغلطة اكتر من مرة و انت متأكد انك ح تنجح في المرة الجاية..

٤-انك لا ترجع عن غلطتك من بدري، زي اللي اتحبس في اول ماسورة ضيقة ، و تكمل في الماسورة و تتحشر و انت فاكر انك ح تطلع من الناحية التانية ..

٥-انك تخسر ناس بتحبك و مخلصة ليك و تترمي في احضان أعداء عاملين انهم اصحابك..

٦-انك تتبطر علي النعمة الاي ربنا اداهالك فتخسرها ، تخسر اهلك أو شريك حياتك أو اولادك أو شغلك بسبب اهمالك و جهلك ، و بعدين تندم وقت ما الندم لا يصلح..

٧-انك ما "تديش العيش لخبازه " ، فتضيع وقتك و مجهودك و تخسر و تغرم لأنك ما اختارتش صح أو ما استشرتش صح..

٨-انك تسترخص فتخسر، و من بخلك و تقريطك تاخد قراراتك بس علي اساس الفلوس، فتضيع ناس و فرص و ناس ممكن ما تعوضهمش..

٩-انك تبالغ و تبذر و تضيع اللي عندك بسبب كرمك المزيف و حبك للمظاهر..

١٠-انك تبيع الغالي بالرخيص، و تخون الحبيب و تغدر باللي شاريك و تشتري اللي بايعك ، و تكمل في اللي انت فيه و ما تسمعش لصوت قلبك و ضميرك و تكمل في حماقتك و خسايرك و أنت فاكر إنك صح ..

هوامش : الحمار غير الغبي ، و هو اذكي مما نتصور !!