[walaa farouk]

سؤال:
في وقت مجيء السيد المسيح على السحاب وقت مايراه كل البشر.. هل لو حد صرخ وقال ارحمني.. هيقبل ربنا.. ولا زمان التوبة هيكون انتهى؟؟

الإجابة:
للأسف هيكون زمان التوبة انتهى!
يعني دلوقت زمان التوبة متاح لكن عند مجيء المسيح هيبقى خلاص!

اقولك زي ايه.. لو أنت ليك رصيد في البنك حد حطهولك.. أنا روحت حطيتهولك
بس باسمي واديت تعليمات للبنك إن من حق فلان يسحب.

فأنت طول ما الوديعة دي موجودة في البنك من حقك تسحب
لو جيت أنا سحبتها وتروح انت البنك ويقولك مفيش رصيد!

فده اللي عمله المسيح.. الذبيحة بتاعته جسده اللي مليان بالجراح اللي مازال بينزف لغاية النهاردة.

وشافه يوحنا في سفر الرؤيا "خروف قائم لأنه مذبوح" هذا الجسد اخده معاه حطه في السما على عرش عن يمين الآب.. علشان الدم بتاعه يبقى غفران للبشر.. اللي احنا بناخده كل يوم في الافخارستيا.

ساعة مايخرج من قدس الاقداس ويجي على الارض يبقى الوديعة اتسحبت
فواحد يجري بقى عاوز يارب غفران يقوله مفيش الرصيد انتهى!

علشان كده هيقولوا للجبال اسقطي علينا والاكام غطينا من وجه الجالس على العرش.

مبقاش في فرصة للتوبة!
فاحنا نغتنم الفرصة الآن لئلا يأتي الوقت اللي يتقفل فيه الباب ويقول الحق اقول لكن اني لا اعرفكن!

تفريغ وإعداد وتنسيق
فريق موقع الشجرة المغروسة

نيافة الأنبا رافائيل