[souad jaalouk]

لكل يوم زوّادة: يسوع هوّي الأمل
بيخبرو عن زلمي متشائم كتير شو ما تحكيه بيقدر يلاقي شي سلبي بالموضوع. اذا قلتلو الشمس مصدر الحياة عالأرض بيقلّك ايه بس شوب من وراها، اذا قلتلو ليك القمر شو حلو بيقلّك بالآخر هوّي كومة حجار عاكسة ضَوّ! مرّة عم يحكوه عن رياضة الparapente قال انا ما بعملها قالولو ليش بتخاف من العلو؟ قلّن لأ بس بركي انفختت الباراشوت، قالولو ما بيصير شي بيكون في عاطول وحدة تانية بالشنطة مع المدرّب اللي مرافقك. قلّن بركي هوّي و عم يشيلها علقت بالسحابة و انخزقت كمان!! اذا انت بتركّز عالإشيا البشعة بالحياة رح تشوف كل شي بشع و اذا بتتطلّع عالإشيا بإيجابيّة بتشوف الحياة حلوة! هيدا شي كل واحد بدّو يشتغل فيه عا حالو ما حدا بيقدر يفَرجي التاني بعيونو و لا يحسّ بقلب التاني! بس الأكيد انّو اللي يسوع موجود بحياتو ما فيه إلّا يشوف الأمل و الحب و الإشيا الحلوة! الله معكن