[walaa farouk]

ده غير حرامي الفرح و المولد و الأوتوبيس
اللي بيستني الزحمة و يغفلك و يسرق اللي في جيبك ..

ده حرامي نفسي ، بيسرق فرحتك و سلامك
و نومك الهادي و طموحاتك و أحلامك..

الحرامي اللي بيسرق فرحتك ، كل ما تشوفه ينكد عليك
، تشوفه تشوف بعيد عنك السواد و النقد و الهجوم و الاحباط
، و يحول يومك "ازرق غامق" ..

الحرامي اللي بيوقع بينك و بين الناس و يسرق علاقاتك ..

الحرامي اللي سرق سمعتك و جاب سيرتك بكل كذب
و اغتابك و شوه سمعتك ..

الحرامي اللي بيسرق كلامك و افكارك و ينسبها لنفسه ..

و الحرامي اللي بيسرق حقك و ترقيتك و مكانتك
و بسبب نفوذه و علاقاته بيتسلق عليك و يقعد مكانك ..

الحرامي اللي سرقك بسبب طيبتك و استغلك و سرقك في شغلانة أو مصلحة و خد منك اللي مش من حقه..

الحرامي النصاب اللي عمل نفسه متدين و ادعي البر و التقوي
و القداسة و هو أفاق و مدلس و سيرته تشهد عليه مش ليه..

الدنيا مليانة حرامية و من ده كتير..

لكن برضه مليانة امناء و أصحاب قلوب بيضا
، خدومة و مبهجة
.. تحبك من غير مقابل و تخدمك من قلبها لله في لله .
. ناس تملأ قلبك سلام و طمان ، و تتمني تشوفها كل يوم لانها سبب سعدك و بتخللي يومك جميل و منور ..

يارب ابعد عنا حرامية الفرح ، و ارزقنا برزق الناس المبهجة الجميلة ..