[walaa farouk]

مالوش عزيز ..

قلاب ، خرَاب ، دحلاب، معاملته عذاب ..
مالوش امان و لا ضمان و لا طمان ..

يضحك لك يومين و يقلب عليك سنتين ، و ما تعرفش تمسكه منين !!

تخاف تسكت لا يقول انك عليه مخبي، و تخاف تتكلم لا يقول انك منه معبي..

تقوله نصيحة تبقي بيتلائم ، تبعد عنه يقول بيتراخم..

تجي له كده ما يعجبش، و تجي له كده ما يفهمش .. تيجي له زي ما هو عايز يستضعفك، و تقصر الشر و تبعد يستغلسك..

يستغلك عافية و تحايل، ذوق و قلة ذوق .. و لو قدت صوابعك شمع يعتبر انك محظوظ لأنك خدمته !!

و ياريت عاجب ، يقلب عليك في ثانية علشان تعيش اسير خوفك منه ..

استاذ "قلاب" بيمرجحك و يقلَبك ، و يقلبك، و يرفعك لفوق و يسيبك تنزل علي جدور رقبتك ..

استاذ "قلاب" ده موجود منه كتير .. اللي ما لوش عزيز ده تحرَص منه علشان كمية الجروح اللي ح يعملهالك ممكن تكرهك في نفسك و في عيشتك ..

عاوز حكمة كبيرة في انك تتجنبه بذكاء (و يا ريت من غير ما يحس) علشان تبعد عن أذاه النفسي و المعنوي ..

و حتي لو عرف انك اكتشفت حقيقته فبعدت عنه ، ح يقعد يحاول يرجعك القفص تاني علشان يتسلي بيك ..

اوعي تصدقه لو عمل ايه، بالذات لو كرر مرجحته لمشاعرك من غير رحمة ..

حبه قوي ، و اتجنبه قوي ، و ابعد عنه قوي قوي ..

د.مجدي إسحق