[Mary Naeem]

صلاة أم شهيد إلى مريم في عيد مولدها

مين قدّك، يا أمّي مريم، قادر يفهمني؟!

انخطف ابني منّي بذات اللحظة اللي انطعن فيها قلب بيروت،

ونزف من هيديك اللحظة السودا،

ومش رح يوقّف نزيف لآخر العمر…

في عيد مولدك، يا أمّي، كنت إهديكِ الورد الأحمر

وقلّك: انتبهي ع ابني! ما تخلّيه يغيب عن عينيكِ!

في عيد مولدك هالسنة، يا أمّي، إيديّي فارغين

لأنو الغالي راح… والدم أخد مطرح الوردات…

شو هالوجع الكبير! كيف بدّي إنسى روحي اللي غابت عنّي…

قوليلي… كيف تحمّلتِ موت ابنك؟

كيف حملتِ الصليب؟

كيف شربتِ كاس الوجع لآخر رمق؟

طمّنيني، يا أمّي، ابني اللي ترك الدار هوي عندك هلّق؟

عم يعاين وجه الله؟

عم يتنعّم بحضور ابنك؟

هالمرّة، يا أمّي، بهديكِ إكليل شهادة ابني،

هالشقفة اللي انفصلت عنّي،

ورجعت ع بيت بيّها السماوي…

يا أمّي اللي بالسما، خلّي قلب ابني الحبيب يتّحد بقلب ابنك!

عزائي الوحيد إنو متلما المخلّص غلب الموت وقام من بين الأموات

رح يرفع ابني ع ملكوت الله ليختبر مجد القيامة مع الأبرار والقديسين!

آمين.