[walaa farouk]

يشوع كان اسمه هوشع واطلق عليه موسى اسم يشوع
"ودعا موسى هوشع بن نون "يشوع"" سفر العدد 13: 16
1- يشوع تلميذ موسى
مفيش اجمل من انك تتعلم على يد معلم أو مرشد أو نبي
لكن انك تكون تلميذ لموسى النبي دي حاجة كبيرة في العهد القديم
يشوع طول فترة وجوده مع موسى كان ساكت وبيتعلم في صمت
شاف موسى النبي وهو نازل من على الجبل بلوحين الشريعة مرتين
شاف كل معجزات الله مع شعبه
لغاية ما ارسله موسى النبي ومعاه 11 واحد من كل سبط ليتجسسوا أرض الموعد
واستحق هو وكالب بن يفنة انهم الاثنين الوحيدين اللي دخلوا أرض الموعد
حتى موسى نفسه مات قبل ما يدخل الأرض
2- يشوع المختار
الله اختاره انه يكون بعد موسى النبي ويتولى دخول الشعب للأرض
اللي قال عليها انها تكون ليهم ميراث ويقسمها ليهم
وقدم ليه آيات مشجعة تبين ان الله سنده وفي ظهره باستمرار
لا يَقِفُ إِنْسَانٌ فِي وَجْهِكَ كُلَّ أَيَّامِ حَيَاتِكَ. كَمَا كُنْتُ مَعَ مُوسَى أَكُونُ مَعَكَ. لاَ أُهْمِلُكَ وَلاَ أَتْرُكُكَ.
3- يشوع الخادم
يمكن كانت المقارنة صعبة بينه وبين موسى النبي
زي ما يتنيح أسقف أو بطريرك ويحل محله آخر بتكون في الأول مقارنة بين الجديد والقديم
لكن الله عظّم يشوع قدام كل الشعب
فَقَالَ الرَّبُّ لِيَشُوعَ: «الْيَوْمَ أَبْتَدِئُ أُعَظِّمُكَ فِي أَعْيُنِ جَمِيعِ إِسْرَائِيلَ لِكَيْ يَعْلَمُوا أَنِّي كَمَا كُنْتُ مَعَ مُوسَى أَكُونُ مَعَكَ.
تخيلوا مقدار حب الله ليشوع انه بيساعده في كل خطوة يمشيها
وبالمثل يشوع كان يستشير الله في كل خطوة يعملها
ومن ثقته في الله عمل ما هو أعظم
فاكرين لما وقف الشمس انها تغرب؟
حِينَئِذٍ كَلَّمَ يَشُوعُ الرَّبَّ، يَوْمَ أَسْلَمَ الرَّبُّ الأَمُورِيِّينَ أَمَامَ بَنِي إِسْرَائِيلَ،

وَقَالَ أَمَامَ عُيُونِ إِسْرَائِيلَ: «يَا شَمْسُ دُومِي عَلَى جِبْعُونَ، وَيَا قَمَرُ عَلَى وَادِي أَيَّلُونَ».
4- يشوع الناجح
يشوع انطبقت عليه الآية اللي كانت على يوسف الصديق
كان الله مع يوسف فكان رجلا ناجحا
ونقدر بلا شك نقول كان الله مع يشوع فكان رجلا ناجحا
في كل حروبه ، ارشاده ، مهابته قدام الشعب
حتى في قراراته كان ناجح
تعالوا نطبق اللي اتعلمناه
1- على قدر طاقتك اتعلم من غيرك حتى لو كان طفل
ومهما كبرت فكر انك تلميذ
2- حافظ على قيمتك ان صورة الله ومثاله والله اختارك للحياة فلا تكن انسان بلا قيمة
كن دايما صاحب نفع لغيرك ومصدر سعادة لغيرك
3- اخدم ربنا وهو يعطيك النجاح بس انت بس اعمل اللي عليك
لو انت طالب ذاكر وقدم لربنا مقدار تعبك وربنا يعطيك اضعاف تعبك
لو انت موظف راعي ربنا في تصرفاتك مع المواطنين علشان ربنا ينجحك في كل طرقك