[walaa farouk]

ورد اسمها في الاصحاح 16 من رسالة بولس الرسول إلى أهل رومية
"أوصى إليكم بأختنا فيبى التى هى خادمة الكنيسة التى فى كنخريا، كى تقبلوها فى الرب كما يحق للقديسين، وتقوموا لها فى أى شىء احتاجته منكم. لأنها صارت مساعدة لكثيرين ولى أنا أيضًا"
معنى اسمها منيرة أو مشرقة
لكن ايه اللي يخلي بولس الرسول يكتبها اول اسم في الاصحاح الاخير متقدمة عن كل الرجال وعلى شخصيات كتيرة معروفة؟
تعالوا ندخل في اعماق فيبي الشماسة ونشوف هنتعلم منها ايه؟
1- فيبي المؤمنة
برغم انها أممية ومن كنخريا وده ميناء في كورنثوس في اليونان وكورنثوس مشهورة بأنها بلد متحررة وفيها شرور كتير وفلسفات وبدع وهرطقات زي ما شفنا في رسالتي بولس الرسول لأهل كورنثوس
لكن فيبي لما سمعت كلمات بولس الرسول أمنت بالسيد المسيح وكرست نفسها للخدمة
لم تتزوج ولم تهتم سوى بالخدمة
2- فيبي الشماسة
رتبة الشماسة مش زي الشماس ولكن هي دياكوني يعني خادمة وكانت تعلم الأطفال والسيدات وتساعدهم في المعمودية وتنظيم الخدمة
3- فيبي التلميذة
طبعا كلنا عارفين كمية التعب والجهد اللي هيتعبه بولس الرسول لأنه رسول مسكوني لف العالم كله تقريبا للبشارة بالمسيح
لكن انها تقبل التعب ده من أجل الخدمة
وتكتب الرسالة وتوصلها وتكلف بأعمال للخدمة والكرازة
واستحقت كلمات بولس الرسول عنها
كي تقبلوها في الرب كما يحق للقديسين
لأنها صارت مساعدة لكثيرين ولي أنا أيضا
تعالوا نطبق اللي اتعلمناه
1- مهما كنت عايش في وسط فاسد لا تنجرف للشر وكن مع الله حتى لو كنت انت الوحيد في العالم اللي ماشي في طريق الله
2- على قدر طاقتك اخدم وماتقولش انا معنديش موهبة
الله اعطى لكل واحد موهبة استغلها حتى لو افتقاد الغايب او تمسح الكرسي في بيت الله
الله لن ينسى تعب المحبة
3- لازم يكون لك مرشد وتتلمذ علي ايده
لكن خد بالك انه بشر حتى لو غلط لا تفقد الثقة في الله بسببه