[walaa farouk]

رحت خدمة لقرية في الصعيد سنة ١٩٨٧

- وزعنا بركة على بعض الارامل وكانت " ٥ " أو " ١٠ " جنيه

- بعد كده عملنا إفتقاد وخدمة كلمة عن " إيليا " ..

- بعد الكلمة والاجتماع جت " أرملة " من اللي وزعنا عليهم البركة وأعطتيني " ١٠ قروش و١٠ قروش و٥ قروش و٥ قروش وقرشين وقرشين وقرش "
مجموعهم " ٣٥ قرش "
وقالت لي :
يا ولدي ..
ربنا باعت لك دول بركة عشانك ..

- رديت عليها :
كتر خيرك ، بركة كبيرة ، خليهم معاكِ ، ....
ما قدرتش عليها ، وأصرَّت ..
والخدام قالوا لي :
ما تكسفاهش ، خدهم ، وإحنا ها نعوضها ، ما تكسفهاش

- خدتهم وأنا مكسوف وصعبانة عليّ ..
وبعد الاجتماع طلعت بره البلد واستنيت مكروباص عشان اركب وارجع البيت ، ومافيش مواصلات !

- ساعة ونص ، وجه ميكروباص فيه ٣ أو ٤ ركاب بس ..
ركبت ومعايا ٢ أو ٣ وفي السكة ركبوا ٢ ..
السواق مش طايق نفسه لان عدد الركاب ناقص ..
وقبل ٥ كيلو من الوصول السواق قال :
الاجرة يا بهوات ..

حطيت ايدي في جيبي اشوف المحفظة مالقيتهاش !
الفلوس والبطاقة فيها ؟
طيب أعمل إيه دلوقتي ؟

واحد مادفعشي وكانت اجرته " ٢٠ قرش " ..
السواق نزل اتخانق معاه وضربه قلم .. وجعني انا ..

- يا رب ..
أعمل إيه ؟

- وإفتكرت فلوس " بركة الأرملة " ..
حطيت إيدي في جيبي وطلعت الفلوس وجيت أدفع الاجرة

الأجرة " ٣٥ قرش "

- دفعت الأجرة وأنا بأبكي ..
يارب ..
الست الأرملة دي مش بتعرف تحسب ؟
ولا تعرف ما سيحدث ؟
كيف " الدقة " في إرشادك ليها ؟
يا لعظمة البساطة التي يقودها الله !
تعلِّمت " درس لن انساه طول العمر " !

- تاني يوم رجعت البلد أكمّل الخدمة ..
لقيوا محفظتي اللي ضاعت والبطاقة والفلوس ؟

- رجعت محفظتي ليّ ..
لكن ..

حصلت على " محفظة روحية " فيها " ثروة أنفق منها "
ميراث روحي غالي ..

الله يرعاني ..

وهذه " الارملة " ..
تمت فيها الآية حرفياً :

كفقراء ونحن نغني كثيرين ..
٢ كو٦ : ١٠

لازال هناك أناس بسطاء ويعيشوا الأنجيل ..