[walaa farouk]

من أكتر مُسببات الضغط النفسي هو ( الصراع )
من أول الصراعات الكبيرة زي
الصراع بين إتجاهين مختلفين في الحياة..
عايزين نمشي فيهم في نفس الوقت،
أو صراع ما بين الخير والشر اللي جوانا
( زي ما عَبر عنه بولس الرسول في الكتاب المقدس،
وقال: " كلما أردت أن أفعل الحُسنى أجد الشر حاضر عندي!"
وغيرها كتير من صراعات الحياة،
لازم في وقت نحسم الصراع ده علشان لو ماتحسمش
احنا اللي هنفضل تعبانين ومضغوطين..

زمان كان في شاب غني نفسه يحصل على الحياة الأبدية
وراح سأل الرب يسوع المسيح.. إزاى ممكن أعمل كده؟
فقال له: روح بيع كل أملاكك ووزع فلوسك على الفقراء
وتعالى اتبعني، وهنا الشاب الغني كان في صراع كبير
ما بين إنه يخسر فلوسه كلها وإنه يكسب الحياة الأبدية
وبسبب الصراع اللي مش محسوم ده الإنجيل يقول عنه إنه ( مضى حزينا! )

الحقيقة الصراعات مش هتختفي احنا اللي ضروري نحسمها
ونحدد الإتجاهات اللي عايزين نمشي فيها
لأننا مش هنعرف نمسك العصاية من النص طول الوقت
ولا نص الوقت حتى!
وعلشان كده الرب يسوع المسيح قال
( لو في حد عايز يبني برج.. لازم الأول يقعد ويحسب النفقة )
يعني يكون عارف هو هيخسر إيه علشان يكسب إيه
حسب أولوياته في الحياة وإيه الأغلى عنده.
وانت حَسمت صراعاتك ولا لسه؟