[walaa farouk]

دول ورد الدنيا، و عطر السما و ياسمين الكون ..

لما يتكلموا يحببوك في الحياة من كتر رقتهم ..

روحهم حلوة قوي ، فيها جاذبية طالعة من كل كلمة و صدق و أمانة في كل حرف ..
تشوفهم تحبهم كده علي طول ..

ربنا حاططهم في الدنيا يريحوا الناس و يجبروا خاطرهم
و يسعدوا قلبهم ..

ناس جواها حتة من السما
، ما يعرفوش يتكلموا علي حد الا بالخير ..
و اول ما تيجي سيرة وحشة، يغيروا الحديث و يلتمسوا لهم العذر ..

الخير فيهم سباق، يفكروا يسعدوك من غير ما تطلب
و يدوروا علي راحتك من قبل ما تفكر ..

كلامهم دوا و مشورتهم شفا و قعدتهم دفا و عفا..
تحبهم لله في لله لان من كتر ما قلبهم حلو ربنا فاض عليهم بوجه مبتسم و منور..
عاوز تشوفهم علي طول و تتمني ما يمشوش و ما يبطلوش كلام ، من جمال طبعهم ..

حتي وسط الشر و الظلم ، يخففوا عن نفسهم و عن غيرهم الهم بالرضي و الشكر و التسليم..

و من كتر ما قلبهم طيب ربنا بيدافع عنهم و يخللي حتي اللي ما يعرفهمش يدافع عنهم ..

و تلف الايام و ربنا يظهر حقهم ، و يوري اللي قسيوا عليهم برهم و فضايلهم .. و الناس اللي حاولت تتعبهم يشوفوا بسببهم الويل و بهدلة الليل ، لأن الناس الحلوة دي سكتت و ما طلعش من بقها العيبة و لا الشكوي ؛ و شالت وجعها في قلبها و رضيت و سلمت قضيتها لربنا قاضي القضاة و اله العدل ..

الناس الحلوة دي اوعي تسيبها و لا تفرط فيها .. دول الاي ربنا مصبرنا بيهم علي تعب الدنيا ..