[walaa farouk]

خليك كبير في زعلك ،
فوت لو تعرف ، عاتب لو تقدر ،
انما لازم تلتمس العذر و تخلي أخلاقك تغلب الموقف ..
بعد كده حط حدود لو تحب و ابعد لو لازم
، إنما اوعي تتخانق و تغضب و تخاصم و تخسر اي حد ..

خليك كبير في كرمك..
اعزم اكتر ما تتعزم و إدي دايما اكتر ما تاخد ..
خليك كريم لما تسيب باقي وانت بتحاسب حد ..
كام جنيه مش ح يفرقوا معاك
لكن يفرقوا مع حد محتاج و الغلابة كتير ..

خليك كبير في عطائك.
. اي عمل إدي فيه زيادة ؛
لو بتتعامل مع حد في الشغل ادي له اكتر شوية من الخدمة
اللي محتاجها: شوية ذوق علي ابتسامة علي مبادرة علي مساعدة علي تبسيط اي خطوة ..كفاية يطلع مبسوط و يدعي لك ، و دي بالدنيا ..

خليك كبير في كلامك..
ما تجيبش سيرة حد الا بالخير ، ما تجرحش حد ،
ما تسخرش من عيب عنده، ما تتنمرش عليه لا قدام الناس
و لا لوحده .. لو حسيت ان كلمة هزار ما عجبتوش ،
اعتذر و ما تقولهاش تاني ،
و لو حسيت انه حساس لاطفه و اجبر خاطره ..
دي حاجة غالية قوي عند الناس ..

خليك كبير في شغلك..
اقرأ و اتعب و خليك امين و كفء و حبب الناس في اللي بيطلبوه
أو محتاجينه، تخفف عنهم دنيتهم و تحببهم في ربنا و فيك..
ريحهم و سهل دنيتهم و دى احلي خدمة ..

خليك كبير في مواقفك..
جامل الناس في حزنهم و في فرحتهم، أسأل عليهم ،
اخدمهم كل ما تقدر ، خليك جنبهم، رد عليهم علي قد ما تقدر و سلم عليهم و رحب بيهم، و خللي بيتك و شغلك مفتوح للكل ..

الكبير كبير مش بسنه و لا بفلوسه و لا بمنصبه، لكن بأخلاقه و أدبه و مواقفه، و ده عند ربنا قمة التدين و العبادة ..

مش كده و لا ايه؟؟
٠