[walaa farouk]

خميرة عكننة
منين ما يروح "يلدع" و "يلدغ" ..

ما حدش بيسلم لا من كلامه و لا من أفعاله..

متعته الخناق و الشقاق و سوء الأخلاق
، و هوايته زرع الخصومات حتي بين الأشقاء !!

و لما ما بيلاقيش حد يعكنن عليه "بيعكنن علي روحه" ..

علي وشه غضب و في عينيه مر و مرار ..
ما يحبش يشوف حد مرتاح و لا مبسوط
و ما يهونش عليه يريح حد ..

منين ما يروح مشكلة ، و منين ما يتكلم خناقة ،
و منين ما يقعد ضلمة و نكد ..

خميرة العكننة ده ضحية لبيئة مشاكل،
بس غلطته انه سلم نفسه ليها و بدل ما يحاول يغيرها
، بقي زيها و أكتر ..

ساعده و اقف جنبه و ابتسم و قوله كلام حلو ،
يمكن تكون اول واحد يعامله حلو ..
بس لو لقيته مصمم علي "نكده" بعد كل المحبة اللي قدمتها
، ابعد عنه بس بدل ما "تغنيله " ، ابقي "ادعيله" !!