[walaa farouk]

الحياة علمتني إن فيه تلات أنواع من الأصحاب.
النوع الأول: ضهرك وسندك في الدنيا. معاك للآخر!
عنده استعداد يقطع اللي يجي عندك أو عليك.
ده اللي ممكن تطلبه في أي وقت. تقول له أي حاجة.
تتخانقوا وتتصالحوا لكن دايماً مع بعض .
هو موجود. النوع ده قليل! أقل من صوابع الإيد الواحدة.
حافظ عليه. حطه فوق راسك🤩.

النوع التاني: بتاع الهيصة واللمة وال selfie.
ده نوع موجود بوفرة. حلو ولطيف
ويساعدك تعدي مرارة الأيام الصعبة.
لكن لو غبت يوم مش هتلاقيه.
ماهو مكانه في الهيصة. ده بقى لو سمع حد بيشتمك مش هيدافع عنك. هيسكت.
ما تزعلش منه. ماهي دي إمكانياته.
بيخاف شعبيته تتهز لو دافع عنك.
ويمكن يكون أضعف من إنه يدافع عنك أو يقف معاك موقف.
أو يمكن انت مش فارق معاه أساساً. النوع ده تحبه من بعيد.
ما تتوقعش منه حاجة.
انبسط معاه واخرج وفرفش وأتصور معاه السيلفي. بس.🙃

النوع التالت: بقى ممكن يبيعك في ثانية عشان مصلحته.
لو سمع عنك كلمة ماعجبتوش أو عملت حاجة
مش على مزاجه او خصمك صاحبه او معجب بيه
هيقف ضدك مع عدوك.
مش هيدافع ولا هيعاتب عشان يعمل مثالى.
اتوجعت؟ آه. اتصدمت؟ ممكن.
بس لازم تقلب الصفحة. اللى يبقى عليك تبقى عليه.
لإن انت عنده مش مهم خالص!
ومش معنى انك كنت فاكره قريب في يوم إنه هو كمان كان شايف كده. اقلب الصفحة وانسى.
وادعي له ربنا يرزقه باللي أحسن منك ويظهر الحق.وما تنساش لما تشوفه تسلم عليه😑..!!