[walaa farouk]

عمرك حضرت حاجة عن مجتمع الغابة
ولاحظت سلوك الحيوانات هناك؟
طيب عمرك شوفت اعضاء مجتمع الغزلان مثلا؟
ولاحظت سلوكهم اليومي؟..
طيب عايز أحكيلك شوية.. الغزلان مشهورين بحبهم للحياة
ولو إتفرجت عليهم بتشوفهم ماشيين يتمخطروا
وكأن كل حاجة جميلة.. رغم إن كل شوية بيُفقد حد منهم
بسبب الأسود والنمور اللي بتصطادهم وبتتغذى عليهم ،
لكن الحقيقة حتى المصيبة دي.. مش بتمنعهم من الإستمتاع بحياتهم
حتى رغم وجود الخطر الكبير ده حواليهم،
ورغم إن الغزالة الجميلة المُشرقة دي ممكن في أي لحظة
يهجم أسد أو نمر عليها ويفترسها.. لكنها ابداً مش بتعيش خايفة
من اللي هيحصلها بعد ثانية واحدة جاية!..
ببساطة لإن مفيش في ايديها حاجة تعملها
إلا إنها تتبسط بالوقت والإمكانيات اللي ربنا مديهولها!
إحنا كمان.. قلقنا المستمر من اللي ممكن يحصل في المستقبل
( خصوصا اللي مش في ايدينا نتصرف فيه )
عمره ما هيزيل الخطر.. لكنه بس هيفقدنا إستمتاعنا بحياتنا
وبالنعم اللي ربنا إداهالنا !
ده غير انه عدم ثقة في وجود ورعاية ربنا وسندته
ووجوده في المشهد معانا في أدق وأصغر تفاصيل حياتنا
وفي معونته إللي بتسندنا في أي وقت صعب..
اشجعك تستمتع بكل لحظة ودقيقة ويوم.. وثق في معونة ربنا